CEBU, Philippines – Si Keith Claire Carlisle 'KC' Morala mikulit og mahinungdanong daog batok ni Khan Sepanton sa Iloilo City sa katapusang hugna aron pagsakmit sa titulo sa labing unang Rose Pharmacy Women’s Chess Tournament niadtong Domingo didto sa School of Chess nga anaa mahimutang sa ikaduhang andana sa Central Books sa dalan P. del Rosario, ning dakbayan.
Si Morala, nga anaa magtungha sa University of San Carlos, mipukan ni Sepanton aron pagtapos sa iyang kampanya sa maong 7-round Swiss system competition dala ang pinakataas nga iskor,6.5 puntos. Sa iyang bahin, si Shaira Monsalud mipilde ni Aireen Robillos sa katapusan niyang duwa ug mao kadto ang iyang gikinahanglan aron labnihon ang ikaduhang puwesto sa natali niining 5.5 puntos.
Sila si Vic Glysen Derotas, Kylene Mae Eumague, Sepanton ug Marvie Abucay nagtabla human mikulit og 5.0 puntos matag usa, apan si Derotas maoy mipahiluna sa ikatulong puwesto gumikan sa mas taas nga tie-break output. Ang duha ka adlaw nga torneyo nga gipasiugdahan ni IM Kim Steven Yap ug gipaluyohan sa Rose Pharmacy pinaagi ni Cebu chess patron Benjamin ‘Boojie’ Lim. (BANAT NEWS)