Good luck, ERCO-BRO
CEBU, Philippines - Garbo sa Sugbo nga ERCO-BRO Nationals FC mosugod na sa ilang kampanya sa 2014-2015 PFF-Smart National Club Championship dihang ilang harungon ang Stallion FC karong hapon didto sa kaulohan.
Ang Cebu Football Association (CFA) president nga si Ricky Dakay miingon nga suwerte na lang ang ilang paglaum aron modaog sa korona gumikan kay ang unom ka key players sa ERCO-BRO Nationals dili makaduwa.
Segun sa lagda sa UFL, ang Green Archers nga gipangulohan ni Chieffy Caligdong ug duha ka Philippine Air Force booters ang gidid-an sa pagduwa nga nakapugos ni coach Glenn Ramos pagpaduwa sa iyang reserve players.
“We lost six players because of this UFL ruling. Sige lang, mo-challenge lang mi gihapon,” matud pa ni Ramos.
Mao kini ang unang higayon nga ang ERCO-BRO National mirepresentar sa Sugbo ning maong kompetisyon.
Ang ERCO-BRO Nationals ubos sa Group B uban sa Stallions, Global ug M’Lang sa South Cotabato. Ang ERCO-BRO ug M’Lang mao lang ang non-UFL teams nga misulod sa final phase ning PFF event.
Sa laing bahin, naglangkob sa Group A mao ang Loyola Meralco Spark, Kaya FC ug Ceres.
Ang top two teams sa matag grupo moabante sa semifinals round diin ang mga mananaog mag-ilog sa korona ug ang mangapilde magsangka alang sa ikatulong dapit. (BANAT PALARO)
- Latest
