CEBU, Philippines - Nagdaog na ug hingpit nang napunta sa mga kamot sa San Miguel Beermen ang PBA Philippine Cup trophy.
Apan nagkasinabot ang kalibotan sa PBA nga usa sa mga labing kulbahinam ug halandumon nga serye ang nahitabo tali sa Beermen ug Alaska Aces.
Ang Beermen misakmit sa korona human sila midaog batok sa Aces sa Game-7 sa iskor nga 80-78 niadtong Miyerkules. Apan bisan pa’g ang Beermen ang migawas nga mananaog, ang Aces way angay ikauwaw tungod kay napakita nila ang grabe nilang determinasyon pinaagi sa pagpugos sa serye ngadto sa usa ka ‘do-or-die’ game batok sa mas inilog nga San Miguel.
Atol sa awarding, si San Miguel coach Leo Austria miangkon nga mibati siya’g grabeng kalisang dihang napapas sa Alaska ang ilang 23 puntos nga labaw.
Ang Alaska nakalabaw pa sa hinapos nga minuto sa duwa sa wala pa si Arwind Santos miposa og krusyal nga tres sa katapusang 43 segundos nga maoy mihatag kanila sa 79-78 nga labaw.
Grabe nga nakadayeg si Austria sa Alaska nga sa tibuok serye mihatag kanila kalisod tungod sa kaagresibo sa koponan.
Sa iyang bahin, si Alaska coach Alex Compton miangkon nga grabe nasakit siya sa maong kapildihan, apan iyang gipasigarbo ang iyang koponan sa ilang gipakita sa All-Filipino Cup. (BANAT PALARO)