CEBU, Philippines - Nagmabungahon ang pag-host sa Cebu Technological University (CTU) sa 5th Sinulog Arnis Championship gumikan kay ang mga pambato niini maoy nanghawod sa maong torneyo nga gipahigayon niadtong Biyernes.
Ang mga eskrimador sa CTU mikabkab og siyam ka bulawan ug 12 ka silvers aron labnihon ang korona.
Sikit nga misunod sa ikaduhang dapit mao ang Mandaue Stick Fighting Club nga adunay walo ka bulawan ug lima ka silver, samtang ang Banilad Eskrima Club nalandig sa ikatulong dapit bitbit ang pito ka bulawan ug duha ka silver. Ang Ronda Eskrima Club maoy mipatong sa ikaupat nga puwesto dala ang unom ka bulawan ug tulo ka silver. Mikompleto sa Top 11 placers mao ang Magkuno Diamond Eskrima Club, NARAAS, San Miguel Eskrima Club-Olango, Abellana Eskrima Club, Labangon Eskrima Club, Badian Eskrima Club ug ang KSDB. Ang maong torneyo usa ka qualifying event aron makapili og miyembro sa Philippine Team nga mosalmot sa 14th World Arnis Championships sunod tuig. Gipasiugdahan kini sa Doce Pares International ubos sa liderato ni Supreme Grandmaster Diony Cañete, ODL (Order of Datu Lapu-Lapu) ug Master Gerald Cañete, inabagan sa CTU pinaagi ni Cesario Perez. (FREEMAN)