Raga mosalmot sa Pacquiao billiards

CEBU, Philippines – Ang kampiyon sa Sinulog Cebu City Mayor’s Cup 10-ball billiards tournament nga si Anthony Raga mosalmot sa  Manny Pacquiao International Billiards  Tournament nga gikatakda sa Pebrero 15 didto sa General Santos City.

Mao kini ang gikompirmar sa manedyer  ni Raga nga si Lorenzo ‘Chao’ Sy.

Matud ni Sy  nga ang taga-Talisay City nga si Raga  mosugot  nga  morepresentar sa bisan unsang billiard tournament  ubos sa bandera sa team Cebu City  sa  national ug international competitions.

Si Raga giplanohan sab nga paapilon sa umaabot nga Philippine National Games (PN) sa mga international competitions sama sa Southeast Asian Games ug  Asian Games.  Apan ila unang pahulman si Raga ngadto sa Philippine billiards pool aron mahimo na siyang makalarga  gawas sa nasud.

Sumala pa ni Sy nga wala siya’y nakitang problema sa pagpaila ni Raga ngadto sa National Sports Association (NSA) tungod kay mao kini ang  bag-ong  No. 1 billiards player sa tibuok Pilipinas.

Gani, mibilib kang Raga ang kanhi 8-ball ug 9-ball World Pool champion nga si Ronnie ‘The Volcano’ Alcano.

Sila si Sy ug Raga mohimo’g courtesy call ngadto kang Mayor Michael L. Rama karong alas-11 sa buntag diha sa Cebu City Hall.

Naglaraw sab si Sy nga hatagan  si Raga og opurtunidad  nga makasalmot og international tournament didto sa America ug sa Europe kun  adunay imbitasyon sa mga Pinoy billiards players. (BANAT NEWS)