Nakugang ko sa dihang nakadawat og taho nga ang banggiitan nga Sugbuanong basketbolista nga si Woodrow Enriquez, sa edad nga 37-anyos, mipanaw na sa laing kalibotan niadtong Sabado sa kaadlawon. Ang hinungdan sa iyang kamatayon komplikasyon gikan sa nahiaguman niyang cervical spine injury.
Wa man ko magdahum nga sa maong kadali sa panahon siya motaliwan. Ang nakapaguol og maayo kay akong nahibaw-an nga pait diay kaayo ang kahimtang ni Woodrow sa wala pa siya manamilit sa hingpit. Apan dili na lang nako pa tukion kining matang kay gusto nakong lab-ason ang kabilin ni Woodrow sa Cebu sports.
Wa seguro’y molalis nako nga si Woodrow usa sa labing maayong pointguard nga atong nakit-an. Gani kun dili pa lang tungod sa iya gitas-on, hagbay ra unta siyang gilabni sa PBA. Bisan pa man niini, si Woodrow nagbilin og marka natong tanan gumikan kay ang kakuwang niya sa gitas-on iyang gipun-an sa iyang kaidlas, kakilas ug kadasig sud sa hardcourt.
Bisan sa iyang kagamyon, kanunay maghatag og labad sa ulo si Woodrow sa bisan kinsang team nga ilang makaatbang. Maisip man gud siyang tunok sa mata sa ilang kontra. Mubo man tuod siya, apan kanunay siya magbarog nga sama sa usa ka higante sa higayon nga moduwa na gumikan kay napuno man siya og talento.
Sa iyang kaabtik ug kapaspas, lisud kaayo siyang depensaan. Kay gawas nga way kahadlok nga molusot, tayhas sab kaayo siya og outside shooting. Sa iningles pa, usa siya ka well-rounded kon all-around player. Kumpletos rekados.
Mao nang dili na kita matingala nga si Woodrow, sul-ot ang uniporme sa M. Lhuillier Kwarta Padala ubos ni coach Raul 'Yayoy' D. Alcoseba, kanunay modawat og MVP award sa bisan unsang liga nga ilang salmotan sama pananglit sa United Regional Basketball League (URBL) ug ingon man sa Liga Pilipinas. Miyembro sab siya sa Cebu Doctors’ College (CDC) Stallions nga nakampiyon sa Cebu Amateur Athletic Association (nga mao na karon ang CESAFI) niadtong tuig 1999.
Nahisukamod ang karera ni Woodrow sa dihang nakahiagum siya og spinal injury atol sa ilang exhibition game batok sa Alaska Aces upat na ka tuig ang milabay didto sa University of San Carlos (USC)-Main gym. Nakasaksi ko sa maong duwa ug pipila lamang ka metros sa nahimutangan ni Woodrow. Atol sa usa ka fatsbreak play, mosuway unta siya og lay-up atubangan sa depensa ni Sonny Thoss sa Alaska apan kalit lang siya nahagba ug wala na makabarog.
Wa magdahum kaming tanan nga grabe na diay ang kahimtang ni Woodrow. Wala na diay siya panimuot niadtong tungora ug pipila pa ka minuto ang nilabay sa wala pa siya gitabang sa mga paramedics nga misutoy sab dayon paghatod kaniya sa Chong Hua Hospital. Suwerte nga nasalbar pa ang iyang kinabuhi human sa makuting operasyon, apan dili na susama pa ang tanan sa kinabuhi ni Woodrow kay naparalisado na man gyud siya ug wala nay tsansa nga makalakaw.
Duna pay usa ka higayon nga daw motulo akong luha nagtan-aw sa hulagway ni Woodrow nga nagtan-aw sa duwa sa kamaguwangan niyang anak nga si ZJ, nga sakop karon sa USC developmental team. Malipayon ug mapasigarbuhon seguro siya niadtong tungora kay iyang nasuta nga mosunod sa iyang mga tunob si ZJ, apan nagpahipi pud seguro sa iyang dughan ang kaguol nga dili na siya makaduwa pa og basketbol.
Karon natapos na ang tanan niyang pag-antos. Modalit na lang kita og pag-ampo sa pagpahulay niya sa dayon uban ang panghinaut nga mainiton siyang agakon sa Labaw’ng Makagagahum. Ngadto sa pamilya ni Woodrow, duna ko’y ipaambit nga hamubo nga pulong nga hinaut makapahupay og gamay sa inyong gibatyag ning oras sa inyong pagbangutan. "God gave us life, now that He wants to take it back, who are we to complain? Adios kanimo, higalang Woodrow.
Alang sa inyong komentaryo o reaksiyon, mahimong mo-email sa mannix_80@yahoo.com