Anton maoy kampeyon

CEBU, Philippines – Natuman ang pangagpas sa kadaghanang mga maayong laki sa billiards dinhi sa Sugbo nga ang ilang manok nga Talisaynon nga si Anthony "Anton" Raga maoy mahimong kampeyon sa Sinulog Cebu City Mayor's Cup 10-Ball billiards tournament nga natapos kagabii diha sa Jancor Billiards Center sa dan Manalili, ning dakbayan.

Atol sa Race to 11 finals showdown, midaog si Raga batok kang Ruben Cuna sa iskor, 11-5. Miabante si Cuna ngadto sa finals human iyang na-uspet ang kanhi 8-ball ug 9-ball World Pool champion nga si Ronnie "The Volcano" Alcano sa Calamba City, Laguna sa iskor,9-6.

Naangkon ni Raga ang kagumkom kaayong 70 mil pesos isip kampeyon samtang nakabitbit og P30 mil si Cuna. Ang laing top two finishers nakadawat og tag 10 mil pesos matag usa.

Ang promoter ug kanhi Cebu City Sports Commission (CCSC) commissioner nga si Lorenzo "Chao" Sy, maoy mitapos sa lima ka adlaw nga torneyo isip representante ni Cebu City Mayor Michael Rama.

Gidapit ni Sy ang mga cue arstists nga mosalmot sab sa laing billiards tournament karong Oktubre. Kauban ni Sy ang tournament manager nga si Joe Co sa iyang mubong closing remarks diin andam sab si Co nga mosuporta kang Sy. (BANAT NEWS)