3-1 sa Alaska o matabla sa SMB?

CEBU, Philippines – Atngan karon kun moduol na ba ang Alaska Aces sa kampiyonato o subling matabla sa San Miguel Beermen ang serye sa ilang kulbahinam nga PBA Philippine Cup finals.

Ang Alaska ug San Miguel mag-abot na sab alang sa Game-4 sa ilang “best-of-seven” finals karong alas-7 sa gabii didto sa Smart Araneta Coliseum.

Lab-as pa sa huna-huna sa mga PBA fans ang daw imposible nga nabuhat sa Aces diin mihimo sila og ‘come-from-behind’ nga kadaugan bisan pa og gilubong sila og 21 puntos paingon sa third period.

Si Alaska coach Alex Compton,  kinsa  nasurpresa  sa ilang 78-70 nga kadaugan sa Game-3 niadtong Domingo, miangkon nga nakabaton sila og momentum paingon sa Game-4 diin may kahigayonan sila nga moangkon og  3-1 nga labaw.

Ang Aces magsalig gihapon  sa ilang  all-around player Calvin Abueva, Sonny Thoss, Dondon Hontiveros ug Cyrus Baguio.

Sa ilang bahin,  si Beermen coach Leo Austria mitug-an nga ang kakuwang paglawog og bola ngadto ni Cebuano center Junemar Fajardo  maoy usa sa rason sa ilang  kapildihan.

Paningkamotan ni Austria nga mahatagan og taas nga playing time ug field goal attempts ang 6-foot-9 nga si Fajardo. (BANAT NEWS)