Ehemplo sa determinasyon

Bisan kinsa pa ang mopatigbabaw tali sa San Miguel Beermen ug sa Alaska Aces sa nagpadayong 40th PBA Philippine Cup Finals, seguradong ang daugan inig ka human sa ilang best-of-seven title series mao ang mga Sugbuanon. Kini gumikan sa duha ka garbo sa Sugbo sa natad sa basketbol nga way lalis usa sa mga sentro sa atensiyon sa maong kampiyonato. Ang akong gipasabot mao sila si Dondon Hontiveros, ang tadhan nga tirador sa Alaska ug si Junemar Fajardo, ang haring sentro sa San Miguel.

Taliwala sa tumang kasikat nga ilang natagamtaman karon, pipila ra seguro ang nasayod nga ang duha ka gi-idolo natong mga basketbolista, nga pulos produkto sa University of Cebu (UC), nag-agi usa og tunukon ug mapit-os nga dalan.

Bahin ni Dondon, pipila ra seguro ang nahibalo nga sa labing unang duwa niya isip 'pro' sul-ot ang uniporme sa Cebu Gems sa Metropolitan Basketball Association (MBA) niadtong 1998, nakahiagum gilayon siya og injury. Atol sa ilang sangka sa Pangasinan Waves didto sa Narciso Ramos Sports Complex sa Pangasinan, nabuak ang tuo niyang kumagko hinungdan nga wala siya makaduwa tibuok konperensiya. Pait kaayo ang maong kasinatian alang sa usa ka sumusulbong nga basketbolista sama ni Dondon.

Apan inay masugamak sa kaguol, gihimo hinuon ni Dondon ang maong hitabo nga dakung hagit aron mapakita kun unsa siya katakus sa maong duwa. Human makarekober, giladlad ni Dondon ang iyang tinuoray nga kalibre hilabi na sa hait niyang outside shooting nga wala lamang nakapaduol niya sa dughan sa liboan ka fans, apan nahimo sab niyang hagdanan aron langkaton ang MBA “Discovery of the Year” award sa maong tuig.

Sa dihang miaksiyon na og takilid ang MBA niadtong tuig 2001, si Dondon nagpa-release sa Gems aron adto mangindahay sa PBA. Tuod man sa kalidad sa iyang dinuwaan, dali kaayo siya nga gibira sa Tanduay Rhum Masters, nga mao sab ang nahimo niyang taytayan aron malandig sa gikahinaman niyang San Miguel Beermen.

Isip sakop sa Beermen, si Dondon mipakita og maayong labok, ug gani  kaduha siya nakatilaw og kampiyonato niadtong 2004-2005 Fiesta Conference ug 2009 Fiesta Conference. Gawas sa SMB, nakaduwa sab si Dondon si Air 21 Express ug Petron, sa wala pa motugpa sa kasamtangan niyang nahimutangan karon, ang Alaska Aces.  Isip usa ka beterano, anaa kanunay ang presensiya ni Dondon kay dili ikalimod nga kasaligan man gyud siya bisan og asa nga koponan siya mapunta. Apan mibalik og tagring ang iyang pangan sa gipakita niyang labok sa Game -6 sa ilang semifinal series batok sa Rain or Shine. Sa maong duwa, mipatuasik siya lima ka 3-point shots sa katapusang kuwarter nga maoy nakapaaswat sa Alaska ngadto sa Finals. Kun mao kini ang sukaranan, daku kadtong senyales nga ang karaan nga Dondon hayan mibalik na ug seguradong ang maong performance makapakurog sa bisan kinsa nga mobarog sa iyang atubangan.

Sa bahin ni Fajardo, daghan sab seguro ang nanghinganga sa iyang naabot karon. Kay kinsa ba gu’y magtuo nga usa ka higante nga luyat og panglawas ug hinay kaayong lihok mamahimong usa ka gikahadlokan ug dominanteng sentro karon sa Philippine basketball. Dili gyud ko makalimot sa panahon nga ang bitoon gikan sa lungsod sa Pinamungajan kantiyawan ug suliyawan pa sa kadaghanan nga 'balulang." Sa manok pa, daku, hinay og lihok ug walay ayo. Mura’g kengkoy ba, kuwang na lang ingnon mura’g tawo-tawo sa humayan kay magpunay ra man siya’g dupa sa iyang kamot ug sa kahinay sa iyang lihok dali ra kaayo siyang lutsan. Laktod pagka sulti, bakikaw kaayo siya tan-awon sa iyang porma ug linihokan.

Apan wala panumbalinga kining tanan ni Fajardo. Sa hilom, doble kayod siya sa ensayo ug migahin siya og sobrang panahon aron bairon og maayo ang iyang abilidad. Ang iyang sakripisyo ug paningkamot nagbunga gyud sa dayon ug kini nagsugod sa dihang iyang gitimon ang UC Webmasters sa duha ka sunod-sunod nga CESAFI championships niadtong tuig 2010-2011. Wala magdugay, mikulit siya og kasaysayan isip labing unang Sugbuanon nga nahimong No. 1 overall pick sa PBA Draft.

Dili hinuon tanan haruhay ang iyang naagian kay si Fajardo pipila sab ka bulan nga wala ka duwa gumikan sa groin injury. Apan sama ni Dondon, mangtas ang gipakitang pagbangon ni Fajardo human madagma gikan sa injury. Nahimo siyang regular season MVP sa 39th PBA season ug nalakip isip usa sa labing mahinungdanon miyembro sa Gilas Pilipinas nga nakabira og silver medal sa 2013 FIBA Asia Cup. Apan ang labing impresibong labok nga gipakita ni Fajardo nahitabo sa FIBA World Cup sa miaging tuig didto sa Spain diin daghan ang misaludo sa iyang dinuwaan ug gani yano ra niyang gilamoy ang depensa sa mas dagku ug higante niyang kaparang gikan sa nasud sa Argentina, Croatia, Greece, Puerto Rico,ug Senegal. Didto nagmarka og pangan si Fajardo isip usa sa labing mahinungdanon, kahadlokan ug dominante nga basketbolista karon sa nasud ug sa umaabot pang katuigan.

Kun atong panaminan ang kasinatian nilang Dondon Hontiveros ug Junemar Fajardo, atong malantaw nga ang kinabuhi dili puro abilidad ug talento lamang. Kinahanglan nga kamao sab kita mosakripisyo, dunay positibong panglantaw taliwala sa mga pagsulay,  ug labaw sa tanan dunay tumang dedikasyon ug determinasyon aron atong makab-ot sa hingpit ang kalampusan nga atong gihandum sa kinabuhi.

Kun dunay mga komentaryo o reaksiyon, mahimong mo-email sa [email protected]