Tabal misidlak sa Mandaue Foam Run

CEBU, Philippines – Subling gipakita sa road running queen sa nasud nga si Mary Joy Tabal iyang kapaspas human siya migawas nga mananaug sa 21K women’s class sa 1st Mandaue Foam Run kagahapon sa buntag didto sa Ayala Center Cebu Terraces.

Si Tabal mitapos sa half marathon sud sa usa ka oras, 24 minutos ug 10 segundos. Ang triathlete nga si Lorhiz Echavez-Lopez misakiyo sa second place sa oras nga 1:45:13, samtang si Madelyn Carter maoy third placer sa oras nga 1:46:28.

Sa men’s open, ang Kenyan nga si Isaac Simat maoy labing paspas sa oras nga 1:13:28, samtang ang trail runner nga si Bonifacio Monjas nagsunod sa 1:16:13 ug si Paul James Zafico anaa sa ikatulo sa oras nga 1:17:30.

Sa 12K class, laing Kenyan nga si Abraham Missos ug Cebuana long distance runner nga si Lovely Fe Andrin maoy midominar sa tagsa-tagsa nila ka mga kategoriya.

Si Missos midaog sa oras nga 41:16 batok nila ni Elmert Bartolo (42:08) ug kababayan nga si James Mebei (43:31) alang sa ikaduha ug ikatulong dapit.

Sa iyang bahin si Lovely Fe mirehistro og oras nga 54:54 aron pildehon sila si Keisha Mae Delechos (55:00) ug Michelle Beboso (55:50).

Ang igsuon ni Lovely Fe nga si Cherry maoy nag-una sa 6K women’s class sa oras nga 26:05, gisundan nila ni Lynlie Cardenas (28:10) ug Irish Delechos (29:11).

Sila si Aldrin Agang (20:26), Prince Joy Lee (20:44) ug Robert Daang (21:01) maoy top three finishers sa men’s class.

Migawas usab nga mananaug sila si Locrecio Paloma ug Mary Joy Loberanis sa 3K fun run. (BANAT NEWS)