CEBU, Philippines – Mag-abot na ang dalan sa duha ka mga dekalibreng koponan sa gikahinaman nga kampiyonato sa Sunday.Com Basketball Club Christmas League 2014.
Ang top two contenders nga Alit’z ug Bulldog magsangka sa “knockout” finals karong adlawa didto sa Barangay Ibabao-Estancia gym, Mandaue City.
Untop alas-7 sa buntag, sugdan ang kumbati sa magkaribal nga koponan.
Gitapos sa Alit’z ang elimination bitbit ang limpiyong 5-0 nga baraha, samtang ang Bulldog nagtangag og 3-2 win-loss record.
Interesante sa maong duwa mao ang match-up sa managsuong Grafe nga sila si Dodoy ug Tawing, kinsa pulos mga sinaligan sa ilang tagsa-tagsa ka koponan. Si Dodoy moggiya sa haring gangis nga Alit’z, samtang si Tawing sa bangis nga Bulldog.
Ang Alit’z naglaum sa katakus nilang Ritchie Malahos, Gio Antigua ug ingon man nilang Macmac Nadera, Robert Neri, Cres Sayson ug Atty. Sally Malig-on.
Sa pikas bahin, gawas ni Tawing, itugyan ni playing coach ug Sunday.Com president Tata Nadera ang iyang pagsalig ngadto nilang Diosdado Apa Jr., Junie Ouano, Joel Llenes ug Blakie Casals. Magpaabot sab sila sa suporta sa ilang kaubanan sama nila ni Cyril Gulbin, Rico Cabello, Diosdado Apa Sr., Allan Bacus ug Frankie Antigua.
Human sa duwa, himuon dayon ang awarding ceremonies lakip na ang pagpili og season MVP, final MVP ug Mythical Five.
Isunod sab dayon ang ilang tinuig nga Christmas Party didto sa Tawig Resort sa Tayud, Consolacion. (BANAT NEWS)