CEBU, Philippines - Gipakgang sa Memphis Grizzlies ang nagkutay nga 16 ka daog sa Golden State Warriors pinaagi sa pag-iskor og 105-98 sa nagpadayong aksiyon sa National Basketball Association kagahapon didto sa FedEX Forum sa Memphis, Tennessee.
Si Marc Gasol miposa’g 24 puntos aron pakgangon ang NBA-best 16-game winning streak sa Warriors.
Ang Warriors mirehistro sa ilang NBA best record nga 21-2 ug mao pa lang kadto ang una nilang pilde sukad niadtong Nobiyembre 11 dihang miyukbo sila sa defending champion San Antonio Spurs.
Mao kini ang unang higayon sa kasaysayan sa NBA nga ang duha ka teams nga nagsangka parehong naghupot og labing menos 19 ka daog sa una nilang 24 ka duwa.
Gawas ni Gasol, sila si Mike Conley ug Zach Randolph miiskor sab og 24 puntos matag usa ug milangkat sab og 10 ka rebounds alang sa Memphis, kinsa midaog na og lima ka sagunson nga duwa.
Si Vince Carter mihimo og season-high 16 puntos alang sa Memphis, samtang si Jon Leuer miamot og 11 puntos.
Miposa og 19 puntos si Stephen Curry, apan misipyat siya sa iyang back-to-back 3-point attempts sa nahibiling 10 segundos sa duwa. Si Curry igo lang nakahimo’g 1-for-10 gikan sa three-point arc.
Si Klay Thompson maoy nangu sa Warriors sa iyang 22 puntos samtang si Marreese Speights midugang og 18 puntos ug si Harrison Barnes adunay 11 puntos.
Ang Warriors nabiyaan og labing menos 14 puntos, apan mi-rally kini aron mosikit ngadto na lang sa dos puntos, 88-90 sa alley-oop dunk ni Shaun Livingston sa nahabiling 5:09 sa fourth quarter.
Dali ra sab hinuon kaayong mitubag og 7-0 run ang Memphis ug human sa basket ni Courtney Lee.
Ang mga reserves sa Memphis maoy nakatabang pag-inat sa ilang labaw. Ang Memphis mihimo sa labing maayong rally sa kasaysayan sa ilang franchise dihang mipabuhagay sila’g sunod-sunod nga 20 puntos.
Mibawos unta og 14-2 run ang Warriors, apan wala na sila makasikit pag-usab ug pakyas sa ilang tinguha pagkulit og daog.
Sa lain pang mga duwa, ang Dallas Mavericks yano kaayong milubong sa New York Knicks, 107-87, ang Washington Wizards mipilde sa Minnesota Timberwolves, 109-95, ang New Orleans Pelicans midaog batok sa Utah Jazz, 119-111. Gipakaging sa Miami Heat ang Brooklyn Nets, 95-91 ug ang Oklahoma City Thunder mikastigo sa Sacramento Kings, 104-92. (BANAT NEWS)