CEBU, Philippines – Gipukan sa University of the Visayas ang Holy Child College of Davao sa iskor, 65-46 kagahapon aron langkaton ang kampiyonato sa titulo sa Milo-BEST SPB and Passerelle basketball tournament didto sa Sacred Heart School-Ateneo de Cebu Canduman Campus sa Mandaue City.
Wala makatilaw og labaw ang Holy Child batok sa UV kinsa misamot ka-ikag ug kainspiradong mudaog sa korona human sa ilang 41-55 nga kapildehan sa Holy Child sayo kagahapon.
Si Denzel Sabroso mirakrak og tulo ka three-pointers sa second quarter aron hatagan ang UV og 35-20 nga abante samtang sila si Kint Ariar, John Paquibut, ug Joshua Canoy nagkumboya og 11 puntos pinaagi sa ilang maayong opensa ug depensa didto sa third quarter.
Milampos ang UV pagdepensa sa big man sa Holy Child nga si Allan Beltran aron sakmiton ang korona nga maoy labing una nilang national Passerelle championship sukad ilang gilusad ang ilang SBP & Passerelle program niadtong 2010.
Ang malipayon kaayong team manager ug Athletic Director sa UV nga si Congressman Samsam Gullas miluwat dayon og mensahe human sa ilang kadaugan.
Ang kinatibuk-an sa iyang mensahe mao ang mosunod: “Best Passerelle team in the country, that sounds so good to hear. As happy as I am that we are the national champions I'm just happy for Cebu Basketball in general. These past two national competitions PCCL and MILO BEST showed that the gap between Manila and Cebu basketball is narrowing. As a provincial team and winning it all against the Giants of Luzon and Manila makes its all the more sweeter. Even having a Visayas vs Mindanao championship is a tribute to the narrowing gap as well. But for UV, best Passerelle team in the country sounds very good to me. Congratulations UV Passerelle Team.” (GGM) (BANAT NEWS)