CEBU, Philippines - Ilogan nilang ex-UC Webmasters Daniel Enriquez sa MP Brokers ug Julius Tarona sa Rollway-Petracorta Brokers ang MVP award sa 3rd BOC-CIPU Friendship Cup basketball tournament didto sa barangay Tinago gym, ning dakbayan.
Atol sa halftime sa sangka tali sa Customs Portmen ni outgoing BOC-CIPU president Boodie Monteno ug Alin Brokers ni Israel Alin alang sa ikatulong dapit, gihimo ang yano nga awarding ceremony ngadto sa Mythical 10 ug ingon man special awards.
Napili ngadto sa Mythical 10 mao ang mga kandidato pagka-MVP nga silang Enriquez ug Tarona, uban nila ni Lyric Into ug Jaypee Maunes sa Portmen, Ryan Villomo sa Alin Brokers, Arnel Factor sa Lao Brokers, Marine Marata sa MCWD, Gerry Singson sa Ynah Brokers, Ken Pino sa CEI ni Wiljohn ‘Sugar’ Camay ug Peter Tejeno sa Transwise.
Ang tanang mga awardees nakadawat og medalya ug certificates.
Ang nakadawat og mga special awards mao silang Gerry Singson (consistent scorer) sa iyang 22 puntos matag duwa, ex-USPF Panther Philip Andrew Munez sa CEI (rookie of the year), Ronchito Lleve sa Alin Brokers (most improved player), Daniel Enriquez (best in rebound), Lyric Into (best in assists), Delfin ‘MJ’ Engracial Jr. (sportsmanship award), Ramil Aninon (best in shotblock), incoming president Ryan Barral (best in attire/uniform) ug Arnel ‘Puso’ Viodor (crowd favorite award).