Utok sa mga Mayweathers
Likayan lang nako paghisgot ang resulta sa sangka nila ni Manny Pacquiao ug Chris Algieri nga daan na natong gitagna nga modagan lang inay makigharong sa gianggaan og Pacman.
Ang nindot karon paabuton kun unsay tubag ni Floyd Mayweather Jr. sa hagit ni Pacquiao.
Ang amahan ni Mayweather nga si Floyd Sr. mikutab-kutab na man sab kay lagi wala gihapon siya’y bilib sa Pinoy boxing icon.
Natural unsa pa may mapaabot nato niya. Kadto bitaw si Ricky Hatton nga siya’y nag-train, pwerteng bula-bula sa iyang baba atol sa training camp sa duha ka kampo, pero diay to, kutob ra sa 2nd round iyang manok kang Pacquiao.
Apan iyang anak miabot pa og napulo ka round una pa na TKO si Hatton.
Ning bag-o, si Mayweather Jr. mi-post pagbalik sa iyang instagram 16 segundos nga video ni Pacquiao nga na-KO sa 6th round batok ni Juan Manuel Marquez. Daghan ang miingon nga “lucky punch” ra ‘to, si Marquez wala moangkon niini, apan dili na siya gustong makaatubang si Pacquiao ibabaw sa ring.
Apan kang Mayweather Jr., ang nahitabo kang Pacquiao nindot nga rason aron likayan ang Pinoy. Kutob na lang ba siya sa sungog?
Kining duha ka mga Mayweathers maayong pakungon ang mga ulo tungod kay pulos lang hangin ang sud.
* * *
Daghang salamat sa “Media Got Talent” night nga gi-host sa Aboitiz alang sa Cebu media sa miaging gabii. More power sa mga organizers ug sa mga nagpaluyo sa maong kompaniya.
* * *
PagtulOn-an: “Today is victory over yourself of yesterday; tomorrow is your victory over lesser men.”
–Shimen Miyamoto Musashi
- Latest
