Lancers gipana sa Archers

CEBU, Philippines - Nagmangtas ang defending champion De La Salle University  Green Archers  sa second half aron mokulit og 74-64 nga kadaugan batok sa University of the Visayas Green Lancers  sa  Philippine Collegiate Champions League (PCCL) Elite Eight Series-Cebu Leg kagabii didto sa Cebu Coliseum.

Naglabaw pirme ang Lancers sa sayong bahin sa  duwa ug gitapos nila  ang first quarter sa iskor, 22-21.

Dihang nasakmit na sa Archers ang  labaw sa second period, wala na nila tugoti nga mailog pagbalik  sa Lancers ang momentum.

Usa ka 6-0 run gikan ni Ben Mbala  maoy naghatag sa Archers og siyete puntos nga labaw sa halftime, 39-32.  Padayong gikontrolar sa La Salle ang third period ug ang 12-4 scoring run sa Lancers maoy nakapukaw kanila aron mobawos diin miposte sila’g 71-54 sa katapusang kuwatro minutos sa duwa.

Si Mbala maoy nangu sa Archers sa iyang 19 puntos, si Jeron Teng  miamot og 10 puntos. Silang Mbala ug Teng wala na  pasudla sa fourth period.

Si Alfred Codilla maoy nangu sa Lancers sa iyang 16 puntos, si John Michael Abad mitampo’g 15 puntos.

Puntos matag usa

DLSU (74) –  Mbala 19, Teng 10, Bolick 9, Muyang 7, Tratter 6, Mustre 5, Pascual 5, Torres 4, Salem 3, Rivero 3, Montalbo 3.

UV (64) – Codilla 16, Abad 15, Perolino 8, Akomo 6, Segumpan 6, Santillan 4, Manzo 4, Mpouma 2, Soliva 2. (BANAT NEWS)