Mabuak kaha ang record?

CEBU, Philippines - Hingpiton  na  ni  two-division world champion Donnie ‘Ahas’ Nietes (33-1, 19KOs) ang iyang legasiya isip usa sa labing ngilngig nga Pinoy boxing champion sa kasaysayan dihang modepensa  siya sa  iyang WBO light flyweight title batok ni Mexican challenger Carlos ‘Chapito’ Velarde (26-3-1, 14KOs) sa main event sa “Pinoy Pride 28: History in the Making” karong gabii sa Waterfront Cebu City Hotel and Casino.

Tulo na lang bulan ang kuwang  ni Nietes aron iyang mabuak ang rekord ni kanhi Cebuano boxing legend Gabriel ‘Flash’ Elorde isip ‘longest reigning Filipino world boxing champion’.

Si Elorde naghari sa world light welterweight sud sa pito ka tuig ug tulo ka buwan.

Ang amahan sa ALA Boxing Gym nga si Antonio L. Aldeguer nagkanayon nga layo na gyud og naabtan si Nietes, kinsa nagsugod sa iyang gym isip usa ka janitor, apan sukad nga nakahukom kini nga mag-boksidor, wala siya’y duda nga layo ang maabot sa Pinoy boxer.

“He (Nietes) has come a long way but I never doubted his ability of being one of the greatest fighter coming from my gym,” matud pa ni Aldeguer. “Donnie is the face of ALA Boxing and his success really matters to us. Aside from being a good boxer, Donnie exemplifies a true and great boxing champion being a skillful yet humble champion.”

Atol sa official weigh-in kagahapon, ang garbo sa Murcia, Negros Occidental nga si Nietes mikuha sa timbang nga 107 lbs. ubos og usa ka libra kang Velarde.

Tungod kay  mohimo og kasaysayan, si Nietes maninguhang modaog sa impresibong paagi aron madepensahan iyang bakus.

“Lig-on siya (Velarde) pero naneguro ko ug sakto akong kondisyon, di ko makasulti unsa round pero matumba lagi ni,” matud pa sa 32-anyos nga si Nietes.

Sa supporting main event, si  one-time world title challenger Milan ‘El Metodico’ Melindo (31-1, 12KOs) makigharong ni Mexican Saul ‘Baby’ Juarez (20-3, 11KOs) sa ilang IBF light flyweight title eliminator.

Manalipod sab si ALA super bantamweight prospect ‘Prince’ Albert Pagara (21-0, 15KOs) sa iyang IBF Intercontinental belt batok Raul Hirales (20-3, 11KOs) sa Mexico.

Sa undercards, duha  ka ALA boxers nga sila si Merlito ‘Tiger’ Sabillo ug AJ ‘Bazooka’ Banal makigsangka batok sa tagsa-tagsa nila ka mga langyaw’ng  boksidor.

Si former WBO minimumweight title holder Merlito Sabillo (23-1, 12KOs) makigsinukliay og kumo ni Indonesian Faris Nenggo (8-6, 2KOs), samtang si two-time world challenger Banal (31-2, 22KOs) mosukod sa abilidad  ni Thai Maxsaisai Sithsaithong (15-5, 4KOs). (BANAT NEWS)