CEBU, Philippines - Pipila na ka mga lig-ong Mexican boxers ang gipilde ni two-division boxing world champion Donnie ‘Ahas’ Nietes ug ang nakasakit kay napakyas sila sa ilang saad pagtumba sa ALA boxer.
Gumikan niini, ang WBO light flyweight champion nga si Nietes mitug-an nga gipul-an na siya og paminaw sa mga bahad gikan sa mga Mehikanong boksidor human ang iyang challenger nga si Carlos ‘Chapito’ Velarde nanganti sab pagtumba saPinoy champion.
Si Nietes, kinsa mangahas pagbuak sa rekord ni Gabriel ‘Flash’ Elorde isip labing dugay nga Pinoy world champion, modepensa sa iyang titulo batok ni Velarde sa main event sa “Pinoy Pride 28: History in the Making” ugma sa gabii diha sa Waterfront Cebu City Hotel and Casino.
Si Elorde nahimong world junior welterweight champion sud sa pito ka tuig ug tulo ka bulan.
“Buhaton na lang ibabaw sa ring dili magsige og sulti,” matud pa ni Nietes atol sa final press conference kagahapon didto sa Tin Gow Restaurant sa Waterfront Hotel. “Napul-an nako ana ilang linya nga tumbahon ko tanan na lang Mexican nga akong nakontra mao ila isulti, ila na lang unta buhaton dili magsige og sulti ana.”
Si Nietes mosaka sa ring nga puno og kompiyansa ug misaad nga mopakita’g impresibo nga kadaugan.
Kini ang katapusang away ni Nietes sa 108 lbs. sa dili pa moambak sa flyweight division diin tinguha niya nga mahimong three-division world champion.
Sa supporting main event, si Milan ‘El Metodico’ Melindo mosuway pagtuman sa iyang damgo nga mahimong world champion sa iyang pakigsangka ni Mexican Saul ‘Baby’ Juarez sa IBF light flyweight eliminator.
Si ‘Prince’ Albert Pagara sa iyang bahin, modepensa sa iyang IBF Intercontinental light featherweight title batok sa laing Mehikano nga si Raul Hirales.
Sa undercard, laing duha ka ALA stars nga sila si Merlito ‘Tiger’ Sabillo ug AJ ‘Bazooka’ Banal moaway usab batok sa tagsa-tagsa nila ka mga langyaw’ng kaatbang. Si Sabillo moharong ni Indonesian Faris Nenggo, samtang si Banal makigbinukbukay ni Thai Maxsaisai Sithsaithong. (BANAT NEWS)