CEBU, Philippines – Kanhi Mexican world champion Carlos ‘Chapito’ Velarde (26-3, 14KOs) gusto nga mapatik sa kasaysayan pinaagi sa pag-iskor og dakung “upset” batok ni WBO light flyweight champion Donnie ‘Ahas’ Nietes (33-1, 19KOs) sa main event sa ‘Pinoy Pride 28: History in the Making’ fight card karong Sabado sa gabii diha sa Pacific grand ballroom sa Waterfront-Cebu City Hotel and Casino.
Sayod si Velarde nga nag-apas sab og kasaysayan si Nietes, kinsa buot sab nga mobuak sa rekord ni Gabriel ‘Flash’ Elorde isip labing dugay nga Pinoy world champion.
“I see Nietes as a solid champion and I know this is an important fight for him but I am here to get it,” matud pa sa 24-anyos nga si Velarde atol sa press conference kagahapon didto sa Raja Park Hotel.
“He wants to make history, but I also want to be part of history by beating him”
Bisan og manghod siya’g walo ka tuig kay ni Nietes, dili kabintahaan ang kasinatian ni Velarde ilabi na nga nakaaway na siya og world title.
Si Velarde miaway na kaniadto alang sa WBA minimumweight title apan napilde pinaagi sa fifth round TKO ngadto ni Japanese Ryo Miyazaki niadtong Agosto 2013 didto sa Osaka, Japan.
“I have been in this situation before but the difference is that this time I know what to do to win. Nietes is a great boxer and I like his style but I have the advantage and that is being a Mexican warrior,” sumala pa ni Velarde.
Wala usab niya tangtanga ang posibilidad pagtumba ni Nietes sa ilang away kun makahigayon.
“I am the type of boxer with a one punch knockout but I am prepared if the fight goes the distance.”
Gawas ni Velarde, laing tulo ka Mexican boxers ang mosuway sab pag-iskor og daog sa balwarte sa ilang mga kontra. Sila mao si Raul Hirales [22-3, 11KOs], Saul ‘Baby’ Juarez ug WBO minimumweight champion Francisco ‘Chihuas’ Rodriguez [16-2, 11KOs].
Si Hirales mohagit ni Albert ‘Prince’ Pagara (21-2, 15KOs) alang sa IBF Intercontinental light featherweight title, samtang si Juarez makigsangka ni Milan ‘El Metodico’ Melindo (31-1, 12KOs) sa IBF light flyweight title eliminator.
Si Rodriguez, kinsa maoy mipalagpot ni ALA boxer Merlito Sabillo sa iyang trono niadtong Marso 22 didto sa Mexico, mosukod sa abilidad ni Jomar Fajardo [14-5, 7KOs] sa Aljoe Jaro stable sa usa ka 10 round non-title bout. (BANAT NEWS)