Lima ka duwa sa PCCL

CEBU, Philippines - Lima ka duwa ang gikatakda dinhi sa Sugbo sa pagbukas sa Philippine Collegiate Champions League (PCCL) Visayas Island-Cebu Leg nga pagahimoon gikan sa Nobiyembre 13-17 sa wala pa nganli nga benyu.

Upat ka teams gikan sa Manila maoy makigsangka batok sa tulo ka teams dinhi sa Sugbo nga maoy top three sa bag-o lang natapos nga Cebu Schools Athletic Foundation, Inc. kon CESAFI.

Usa na niini ang UAAP Season 77 champion ang National University Bulldogs ug ang champion sa NCAA Season 90 ang San Beda Red Lions kinsa mihimo'g five-peat.

Ang runner-ups sa UAAP  ug sa NCAA misalida sab dinhi sa Sugbo diin anhi mosuway pagpamawi sa ilang pilde ang Far Eastern University Tamaraws ug ang Arellano University Chiefs.

Ang Tamaraws ni coach Nash Racela kinsa miyukbo sa Bulldogs sa UAAP finals, makigtakos batok sa CESAFI runner-up University of San Carlos Warriors sa main game unya sa Nobiyembre 13, adlaw'ng Huwebes nga mosunod sa duwa tali sa champion Southwestern University Cobras batok sa Luzon-Metro Manila qualifier sa opening game.

Pagka sunod adlaw, magsangka ang CESAFI 3rd placer University of the Visayas Green Lancers batok sa Luzon-Metro Manila qualifier ug sundan kini sa sangka tali sa Cobras ug sa Warriors, ang ilang ikawalo nga pagbagat karong tuiga sa usa ka major tournament.

Unya sa Nobiyembre 15, makigsangka ang Lancers batok sa NU Bulldogs samtang magtakos ang Warriors ug ang San Beda. Sa Nobiyembre 16, magsangka ang Arellano batok UV ug suwayan sa Bulldogs pagpatilaw unsa ka hait ang ilang ngipon kung makadulot ba kini sa Cobras.

Sa kataposang adlaw sa PCCL Cebu Leg, magsangka ang Warriors ug ang Lancers ug mosunod ang sangka tali sa Cobras ug sa Arellano. Dili magbagat ang Cobras ug ang Red Lions dinhi tungod kay wala kini makalip sa schedule. (GGM)(BANAT NEWS)