CEBU, Philippines - Nagsalig ang bisitang Myongji University sa South Korea sa ilang kahanas motira gikan sa three-point arc aron mokulit og 73-63 nga kadaugan batok sa Southwestern University (SWU) Cobras sa 10th Asian University Basketball Championship (AUBC)-Cebu Province International Collegiate Cup niadtong Biyernes sa gabii didto sa Minglanilla Sports Complex.
Sa sayo pa, gipakuratan sa University of the Visayas (UV) Green Lancers ang CESAFI runner-up University of San Carlos (USC) Warriors, 83-78 aron tapuson ang elimination round isip no. 1 seed. Nagtabla sila uban sa Warriors sa managsamang 2-1 nga baraha, apan ang Lancers maoy misakmit sa unang dapit pinaagi sa simple tie.
Ang crossover semifinals tali sa UV ug SWU ug ingon man sa USC batok Myongji University giduwa pa sa pagsuwat niini kagahapon.
Ang modaog maoy magsangka sa knockout final karong adlawa didto sa bag-ong gi-renovate nga Cebu City Sports Institute gym sa Sawang Calero.
Ang South Koreans giisip nga underdogs ning lima ka adlaw nga torneyo, apan posible pa nga magmilagro aron maoy mobitbit sa championship trophy.
Si Jungsu maoy nangu sa opensa sa Myongji sa iyang 17 puntos, gisundan nilang Kiwan Ju ug Koo Yeoson nga adunay 16 ug 11 puntos.
Ang Cobras nga mitidlom sa ikaupat nga dapit gipangulohan sab ni Landy Sanjo pinaagi sa iyang 12 puntos ug Mark Jayven Tallo nga adunay 10 puntos.
Sa iyang bahin, si Rhaffy Octobre nabalikan sa iyang kalantip diin mihipos siya’g 17 puntos lakip ang uwahing sayes puntos alang sa Lancers aron pangulohan ang opensa sa iyang team.
Daku sab og gikatampo sa opensa si Jerome Napao, kinsa miposa og 13 puntos, samtang sila John Michael Abad ug Alfred Codilla miabuno’g 11 ug 10 puntos matag usa.
Si Nico Magat mibahog og 17 puntos alang sa Warriors ug si Ian Tagapan mitampo’g 16 puntos. Ang Cameroonian import nga si Shooster Olago midugang og 13 puntos. (BANAT NEWS)