Aduna pay ‘chance’
CEBU, Philippines – Determinado sila si former WBO minimumweight champion Merlito ‘Tiger’ Sabillo ug two-time world title challenger AJ ‘Bazooka’ Banal nga makapamatuod nga adunay pa sila’y katakus nga mahimong world champion sa dihang moatubang sila sa ilang tagsa-tagsa ka misyon sa undercard sa “Pinoy Pride 28: History in the Making” sa Nobiyembre 15 diha sa Waterfront Cebu City Hotel and Casino grand ballroom.
Ang blockbuster fight card bidahan ni ALA Boxing champion Donnie ‘Ahas’ Nietes, kinsa modepensa sa iyang WBO light flyweight title batok ni Mexican challenger Carlos ‘Chapito’ Velarde.
Si Sabillo napakyas pagdepensa sa iyang WBO title batok ni Francisco Rodriguez Jr. niadtong Marso 22 sa Monterrey, Mexico, samtang si Banal napilde pinaagi sa ninth round KO sa iyang sangka alang sa WBO bantamweight title batok ni Thai Pungluang Sor Singyu duha na ka tuig ang milabay didto sa SM Mall of Asia Arena.
“Sakit gyud to nga pilde pero daghan ko’g nakat-onan ug gusto ko nga hinay-hinay nga ibalik akong chance sa world title,” matud pa ni Sabillo.
Si Sabillo (23-1, 12KOs) magsugod sa iyang lakang paingon sa laing world title shot sa iyang pakigharong ni Indonesian Faris Nenggo (8-2, 6KOs).
Sa iyang bahin, si Banal miangkon nga nausikan niya ang duha ka kahigayonan nga mahimong world champion, apan wala siya mawad-i’g paglaum ug tinguha niya nga mosuway sa kausa pang higayon nga mahimong world champion.
Ipamatuod ni Banal (31-2, 22KOs) nga may ikabuga pa siya sa iyang pakigsangka ni Maxsaisai Sithsaithong (15-5, 4KOs) sa Thailand.
Human sa iyang kapildihan batok ni Sor Singyu, si Banal mikulit og three-fight winning streak nga gitapos sa usa ka 2nd round TKO nga kadaugan batok ni Defry Palulu niadtong Hunyo.
“Padayon lang ko sa training ug naghuwat lang ko og chance nga mahatagan pagbalik og title fight,” matud pa ni Banal.
Sa laing attraction, si ALA featherweight prospect Mark Jessel Magsayo (8-0, 6KOs) makigsangka batok ni Moon Sun Jung sa South Korea (2-3). (BANAT NEWS)
- Latest
