Teleperformance misakmit sa Division 1 title sa 10th CSCC E-League

CEBU, Philippines – Giharos sa Teleperformance Vipers ang duha ka duwa sa “best-of-three” finals series aron malangkat ang Division 1 title sa 10th CSCC E-League basketball tournament.

Ang Teleperformance milubong sa karibal nilang Lexmark Stallions sa iskor nga 61-50  niadtong Domingo didto sa City Sports Club-Cebu gym sa Cebu Business Park.

Si James Lester Navaja mipauwan og 17 puntos ug milangkat og tulo ka rebounds alang sa Teleperformance nga mi-rally sa fourth quarter aron mapukan ang Lexmark.

Ang Teleperformance ug Lexmark nagpuli-puli’g pamuntos nga miresulta ngadto sa panagtabla, 34-all human sa tulo ka kuwarter, apan ang Vipers    mipauwan og mga puntos sa hinapos nga bahin sa final period aron lumsan ang Lexmark.

Ang Teleperformance nagpaabot na lang sa modaog sa Division 2 finals tali sa ePerformax Reds ug Convergys 2 Blue Devils.

Ang ePerformax  miinat sa ilang kaugalingon “best-of-three” finals series human modaog sa Game-2 sa iskor nga 65-58.

Si  Robert Gilo  maoy nangu sa ePerformax nga mipabuhagay og 23 puntos, uban ang siyam ka rebounds. Nakakuha sab siya og suporta gikan ni Joey Mari de Guzman, kinsa mitampo’g 12 puntos.

Si Clifford Amarado miposa’g 17 puntos, samtang si Lourenz Limpangog mitusak og 12 puntos aron pangulohan ang napildeng Convergys 2.

Ang ePerformax- Convergys 2 showdown himuon karong Sabado, diin ang modaog maoy makaangkon og katungod sa pakigharong sa nagpaabot nga Teleperformance alang sa 10th CSCC E-League title. (BANAT NEWS)