Donaire gi-KO ni Walters
CEBU, Philippines – Nahiaguman ni Nonito Donaire ang labing sakit niyang kapildehan human siya gi-knockout sa sixth round sa Jamaican nga si Nicholas Walters atol sa ilang sangka alang sa WBA super world featherweight title kagahapon didto sa Carson, California.Sa sangka sa duha ka mga boxing star, mipatigbabaw ang kusog ni Walters dihang mipatugpa siya og makabungog nga right overhand ngadto sa ulo ni Donaire kinsa natumba ug wala na makarekober pa. Naundang ang away sa ika-2:59 sa sixth round.
Nakontrolar pa ni Donaire ang unang duha ka rounds sa away, apan napatumba siya ni Walters sa third round pinaagi sa right uppercut.
Natinuod ang bahad ni Walters nga ipakita ni Donaire nga siya ang mas kusgan nga boksidor sa 126 lbs. division dihang nakita nga mas bug-at iyang kumo nga miresulta sa pagkabun-og sa Fil-American boxer.
Si Donaire wala hinuon mihatag og rason pa sa iyang kapildehan ug luag nga giangkon ang iyang kapildehan sa kamot ni Walters
“Walters knocked the shit out of me,” matud pa ni Donaire sa Associated Press. “He’s an amazing champion. I was at my best, but he came out as tough as I thought.”
Sa punch stats, si Walters mipasud og 85 sa iyang 284 ka mga sukmag, samtang si Donaire igo lang nakapasud og 40 sa iyang 169 nga kinumo.
Ang kapildehan maoy ikatulo ni Donaire sud sa 36 ka away, samtang si Walters pabiling perpekto sa record nga 25-0, 21KOs. (BANAT NEWS)
- Latest
