‘Do-or-die’ sa UV ug SHS-Ateneo

CEBU, Philippines - Mag-abot sa katapusang higayon ang  Sacred Heart School-Ateneo de  Cebu (SHS-AdC) ug ang University of the Visayas (UV) Baby Lancers sa deciding game sa “best-of-three” final series aron  tapuson ang ilang panagribal alang sa  korona sa juniors division sa 14th  Cebu Schools Athletic Foundation, Inc. (CESAFI) karong adlawa diha sa Cebu Coliseum.

Ang Magis Eagles midaog sa opener sa iskor nga 56-51, apan ang Baby Lancers mibawos sa Game-2, 59-56 aron makapugos og rubbermatch karong  alas-2 sa hapon.

Ang  kadaugan maoy nagbugto sa tulo ka pilde sa Baby Lancers  sud sa upat nila ka duwa karon nga season.

Samtang gamiton sa Baby Lancers ang ilang kasinatian, ang Magis Eagles mosuway pagmintinar  sa paggamit sa ilang game plan ug ang ilang maayong ball rotation nga maoy naghatod kanila ngadto sa 11-game winning streak. Nabugto kini human sila mapilde ngadto sa Cebu Institute of Technology-University (CIT-U) Wildkittens, 57-60.

Ang wala damha nga kapildihan ngadto sa Wildkittens  nahimong senyales nga pildihon sab sila'g tres puntos sa Baby Lancers sa Game-2.

Usa ka interesanteng kamatuoran nga sulod sa miaging tulo ka duwa, wala makaabot og 60 puntos ang final score sa Magis Eagles ug ang ilang pinakadaku nga  iskor batok sa Baby Lancers karon nga season mao ang 74-57 nga kadaugan niadtong Septiyembre 27 pagkahuman sa first round sa semifinals.

Karon maoy  adlaw sa paghukom diin ang mopiyong hayan mapilde.

Ang Baby Lancers mosalig  kanilang John Carl Escalona, Orlan Wamar, Theo Joshua Flores, Raul Jancork Cabahug ug Samuel Schaub.

Samtang ang Magis Eagles adto gihapon modangop kang  Janjan Jaboneta uban sa  suporta nilang Joshua Sinclair, Piero Longa, Joseph Mayol, Nino Araw-araw ug  Zach Huang.