Game-1 na CESAFI, UV batok SHS-AdC

CEBU, Philippines – Sugdan karon ang Game-1 sa “best-of-three” finals tali sa topseed Sacred Heart School-Ateneo de Cebu (SHS-AdC) Magis Eagles ug University of the Visayas (UV) Baby Lancers  sa juniors division sa 14th Cebu Schools Athletic Foundation, Inc. (CESAFI) basketball event diha sa Cebu  Coliseum.

Sa dili pa mag-abot ang duha sa alas-6:45 sa gabii,  magsangka una ang Cebu Institute of Technology-University (CIT-U) Wildkittens sa taktakay nga duwa alang sa ikatulong dapit.

Buot sa Magis Eagles nga padayonon ang ilang pagdominar  batok sa Baby Lancers, kinsa duha ka higayon na nilang gipilde karon nga season.

Sa elimination round,  ang Magis Eagles nakalingkawas sa Baby Lancers, 74-71 niadtong Agosto 19 ug midaog sab kini sa semifinals, 74-57 niadtong Septiyembre 27.

Ang Magis Eagles ug Baby Lancers nag-abot na sa finals sa duha ka sunod-sunod nga seasons. Ang Baby Lancers  midaog sa Magis Eagles aron modaog sa titulo niadtong 2011. Pagka sunod tuig, ang Magis Eagles wala lang mipukan sa Baby Lancers, apan mihimo kini’g school record alang sa una nilang kampiyonato  bitbit  ang   14-0  nga baraha Ang Magis  Eagles magsandig nilang Janjan Jaboneta, Joshua Sinclair, Jose Piero Dominic Longa, Zachary Lance Eden Huang ug Niño Araw-araw. Samtang ang Baby Lancers mosalig sa ilang solidong starting unit nga gilangkuban nilang John Carl Escalona, Orlan Wamar, Raul ‘Jancock’ Cabahug, Samuel Schaub ug Theo Joshua Flores. (BANAT NEWS)