CEBU, Philippines – Nagsawo sa dakung kadaugan ang bantugang rider sa Sugbo nga si Jon-Jon Adlawan ug Jubenille Abellar human maghari sa tagsa-tagsa nilang kategoriya sa fifth leg sa 2014 MS Motosuit Motocross Series nga giluoha’g “Calambua Motocross Challenge” niadtong Domingo didto sa Calambua racetrack sa San Remigio sa amihanang bahin sa Sugbo.
Si Adlawan, ang pambato sa Man and Machine Racing Promotions, kinsa mao sab ang veteran contender sa Asian racing circuit, mipalapad sa iyang labaw alang sa lumba sa “Rider of the Year” award human maghari sa pro open category. Iyang gipilde silang Winsor Famorca sa Guimaras ug Jacob Orbe nga miokupar sa ikaduha ug ikatulong dapit.
Pakyas hinuon si Adlawan sa iyang kampanya alang sa double championship, dihang napilde siya ngadto ni Abellar sa expert class. Si Scott Remi sa Dumaguete City nalandig sa ikatulo. Sa intermediate division, si Jacob Orbe mipilde nilang Remi ug JB Bacabac aron sakmiton ang champion’s trophy.
Wala sab hinuon magpaperi silang Remi ug Bacabac kay midaog sila og champion’s trophy sa laing kategoriya. Si Remi naghari sa novice category batok nilang Jed Luna sa Mount Sion Racing Team ug Denmark Supatan, samtang si Bacabac maoy labing paspas nga rider sa executive A. Gisundan nilang Arnel Lacnit ug Roscel Gungob alang sa ikaduha ug ikatulo nga dapit.
May rason sab si Luna nga magselebrar human midaog og duha ka titulo pinaagi sa beginners production ug local enduro. Gipilde niya si Supatan ug Clinton Gualiza sa beginners production, dayon midaog sab siya batok nilang Dongkey Sanchez ug Alex Abalo sa local enduro.
Lain pang category winners ning maong charity event nga hiniusang proyekto sa MS Motosuit big boss Lou Ornopia ug Yamaha Motor Philippines Inc. mao sila si James Duroy (executive B), Jonathan Cuyos (executive C), BJ Pepito (mini 55cc), Lloyd Abrenica (mini 65cc), Edwin Dilao (peewee 50 class), Marie Villafuerte (ladies open), JP Cuesta (open enduro) ug JR Gualiza (underbone).
Atol sa lumba nga nahimong posible tungod sa suporta sa CST Motorcycle Tire, F & FO Motor Parts, RMO Motor Parts, JCO Motor Parts, New MS Apartelle, Prospeed, Motomaze, Ljun Motorparts, N Style Motor Parts, Speed-up Motor Parts, Diosdado Navarez ug Lauron Refrigeration and Airconditioning, ang Yamaha pormal nga milusad sa ilang top-grade motorbikes -- ang XTZ 125 ug Serow 250.
Gitambongan kini ni Yamaha Motor Philippines Sales and Marketing Director Kaoru Ogura, Visayas Regional Manager Carlo Monterola, Marketing Section Manager Ryan Jude Camus ug Marketing Communication Head Jenifer Perey. (BANAT NEWS)