CEBU, Philippines - Hapit na makab-ot ni Donnie ‘Ahas’ Nietes (33-1, 19KOS) ang kasaysayan isip labing dugay nga Pinoy world champion, apan dili sayon ang iyang atubangon tungod kay sangkaon niya ang Mehikano nga si Carlos ‘Chapito’ Velarde (26-3, 14KOs) sa main event sa “Pinoy Pride 28: History in the Making” sa Nobiyembre 15 diha sa Waterfront Cebu City Hotel and Casino.
Laraw ni Nietes, 32-anyos, nga mokulit og kasaysayan isip labing dugay nga world boxing champion pinaagi sa pagbuak sa rekord ni boxing legend Gabriel ‘Flash’ Elorde, kinsa nahimong kampiyon sud sa pito ka tuig ug tulo ka buwan.
Damgo sab ni Nietes nga mahimong three-division world champion sa iyang paglayat ngadto sa 112 lbs. division diin nagpaabot kaniya ang mga kampiyon sama nila ni WBO/WBA champion Juan Francisco Estrada sa Mexico ug WBC king Roman Gonzales sa Nicaragua.
“He (Velarde) is ranked No. 5 in WBO. His a Mexican warrior so this is not an easy fight for Donnie,” matud pa ni ALA Promotions President and CEO Michael Aldeguer.
“After this fight he will go up to 112 lbs.”
“Kompiyansa man ko aning awaya unya nindot man sab akong training,” matud pa ni Nietes.
Sa supporting main event, si Milan ‘El Metodico’ Melindo (31-1, 12KOs) makigharong ni Saul Juarez (20-3, 11KOs) sa usa ka IBF title eliminator sa light flyweight division.
Si Melindo miambak gikan sa flyweight ngadto sa light flyweight sa pamasin nga makuha na niya ang dugay na niyang gihandum nga world title.
Atngan usab ang title defense ni IBF Inter-continental super bantamweight ‘Prince’ Albert Pagara (21-0 15KOs) batok sa mandatory Mexican challenger nga si Raul Hirales (22-3, 11KOs).
Mokompleto sa blockbuster fight card nga gipasiugdahan sa ALA Promotions ug ABS-CBN Sports, mao sila si kanhi minimumweight world champion Merlito ‘Tiger’ Sabillo ug two-time world title challenger AJ ‘Bazooka’ Banal ug rising prospect Jessel Mark ‘Magnifico’ Magsayo batok sa wala pa nila ilhang kontra.