CEBU, Philippines – Naunhan sa Cebu Landmasters ang defending champion Goldberry Iloilo Hotel human sila moiskor og 71-68 nga kadaugan sa Game-1 sa “best-of-three” finals sa The Avenir SHAABAA Cup Season 19 niadtong Domingo didto sa Magis Eagles Arena sa Canduman Campus, Mandaue City.
Kinahanglan lang modaog ang Landmasters sa Game-2 aron maangkon pagbalik ang kampiyonato. Apan dili angay mokumpiyansa ang Landmasters ni team owner Franco Soberano tungod kay ang Goldberry dili madali-dali kay isip defending champion, aduna sab sila’y ikasugakod.
Si Kyle Valmoria maoy nangu sa Landmasters sa iyang 15 puntos, samtang ang kanhi UC Webmaster nga si Moncrief Rogado midugang og 13 puntos.
Ang kanhi USC Warrior nga si Robert Gilo mao sab ang nangu sa Goldberry sa iyang 19 puntos, gisundan ni Justin Huang nga adunay 17 puntos. Si ex-USJR Jaguar nga si Joel Co ug si Jeremy Huang nagkumboya’g 21 puntos alang sa Goldberry.
Sa sangka sa ikatulong puwesto sa Division B, ang Belo Men midaog batok sa Echo Appliance, 52-44 sa pagpangulo ni Valiant Ngo, kinsa miburak og 18 puntos.
Silang Erwin Hao, Afshin Ghassemi ug Brian Noel pulos sab miiskor og double digits alang sa Echo. (BANAT NEWS)