CEBU, Philippines – Mag-abot na sab karon ang University of San Jose Recoletos (USJ-R) Jaguars batok sa University of the Visayas (UV) Green Lancers sa Game-1 sa ilang best-of-three series alang sa ikatulong puwesto sa 14th Cebu Schools Athletic Foundation, Inc. (CESAFI) men's basketball tournament diha sa Cebu Coliseum.
Ang Lancers ug Jaguars magsangka sa alas-6:45 sa gabii human sa duwa tali sa Sacred Heart School-Ateneo de Cebu (SHS-AdC) Magis Eagles ug sa Cebu Institute of Technology-University (CIT-U) Wildkittens sa pagsugod sa second round sa juniors division semifinals. Mapiang ang Lancers karon gumikan kay dili makaduwa silang Nigerian import Jeffakins Aguara ug star forward Franz Arong nga pulos gisuspenso ni UV team manager Gerald Anthony ‘Samsam’ Gullas sa nahabiling mga duwa karon nga season tungod sa ilang “unsportsmanship” behaviors atol sa ilang 61-67 nga kapildihan ngadto sa University of San Carlos (USC) Warriors niadtong Septiyembre 13.
Sa pagkawala nilang Aguara ug Arong, sila si John Michael Abad, Rhaffy Oktubre, Chris Perolino, Alwin Aguirre, Leonard Santillan ug Alfred Codilla ang gilauman nga mowadwad og maayo alang sa Lancers.
Sa laing bahin, ang Jaguars magsalig sab nilang James Regalado, Kevin Villafranca, Mark Labares ug Raymond Catipay aron mosuporta sa bugtong nilang import nga si Quentin Luzoladio.
Sa pasiunang duwa, ang Magis Eagles mosuway pag-inat sa ilang 11-0 nga baraha batok sa Wildkittens, kinsa gikan pa sa ilang tulo ka sunod-sunod nga pilde sa semis.
Ang Magis Eagles maglaum gihapon ni Janjan Jaboneta, kinsa maoy nagdala’g bida sa koponan.
Nagkinahanglan sab siya og suporta sa iyang mga kaubanan sama nilang Joshua Sinclair, Joseph Mayol, Jose Piero Dominic Longa, Zachary Lance Eden Huang, Kevin Brian Johnson, Steven Co, Andrew Velasco ug ang ilang top point guard nga si Nino Araw-araw.
Sa kanunay, ang Wildkittens mosalig sab nilang Justin Jules Langres, Jasper Berezo, Joshua Philip Manatad, Kevin Plaza ug Jeroel Pedroza. (BANAT NEWS)