Aloguinsan Mayor’s Cup sugdan na karon sa Alodome
CEBU, Philippines - Buksan na karong gabii ang Aloguinsan Mayor’s Cup 2014 diin upat ka commercial teams ang magsangka didto sa maanindot nga Alodome sa maong lungsod sa habagatang Sugbo.
Ang tinuig nga torneyo gipasiugdahan nilang Aloguinsan Mayor Cynthia Moreno ug Vice Mayor Chonse Moreno uban sa Aloguinsan LGU pinangulohan ni Konsehal Toto Biton, kinsa maoy sports committee chairman.
Unang magsangka mao ang Abrinica batok sa Jomangs sa alas-7 sa gabii ug sundan sa duwa tali sa Carmen Copper Corporation batok Lanlins.
Ganting salapi ug tropeyo ang madawat sa mga mananaog. Ang kampiyon mobulsa og P100,000, ang second placer makadawat og P70,000, ang 3rd makaangkon og P50,000 ug ang fourth mobitbit og P20,000.
Ang torneyo mosubay sa single round robin diin ang top two teams maoy magbagat sa knockout finals, samtang ang laing duha magsangka sa ikatulong puwesto.
Si CESAFI referee Edwin Dejacto maoy technical committee head sa maong torneyo.
- Latest
