2nd San Pedro Calungsod run gitakda karong Oktubre 5
CEBU, Philippines – Gitakda sa Oktubre 5 ang ikaduhang edisyon sa San Pedro Calungsod Run nga magsugod ug matapos sa San Pedro Calungsod chapel ground sa South Road Properties (SRP).
Ang lumba ipahigayon agi’g pahinungod kang San Pedro Calungsod, ang unang Sugbuanong Santo ug ikaduhang Santo nga Filipino sunod ni San Lorenzo Ruiz.
Gibahin ang lumba ngadto sa 3K, 5K ug 16K categories.
Ang lumba magsilbe usab nga fund-raiser diin ang kuwarta nga matigum itabang nilang Jheil Christ Malabago ug Jomar Padica, duha ka underprivileged college students, kinsa mga altar servers nga nadestino sa San Pedro Calungsod chapel.
Sila si Malabago ug Padica pulos gikan sa ubos nga pamilya, apan mipakita sila og hingapin nga pangalagad sa kapilya.
Ganting salapi ang nagpaabot sa top three finishers sa 5K ug 16K, samtang ang 3K category lonlon fun run.
Aduna kini registration fee nga P300 alang sa 3K, P350 sa 5K ug P400 sa 16K.
Mahimong magparehistro sa San Pedro Calungsod chapel office ug sa Runnr sa Active Zone sa Ayala Center-Cebu. (BANAT NEWS)
- Latest
