Miarangkada na ang Asian Games didto sa Incheon, South Korea nga diin kapin sa 100 ka Filipino nga atleta ang mo-compete sa ubang langyaw’ng atleta alang sa bulawang medalya.
Apil sa gikahinaman nako niini ang pagduwa pagbalik sa Gilas Pilipinas karon nga wala na si Andray Blatche.
Daku kaayo unta ang tsansa nato kun si Blatche maoy makauban sa Gilas, ug gani dunay mga tabi-tabi nga nahadlok gyud ang ubang teams sa kombinasyon ni Blatche sa mga Filipino. Apan lain sab kaayo nga atong pakagamyon lang ang talento ni Marcus Douthit. Mas nauna pa nato siya nga naturalized player ug maoy nitabang sa Pilipinas makabalik sa FIBA World Cup. Siguro gikuwangan lang ang mga opisyal sa Gilas sa iyang abilidad.
Gani nakaingon ko nga “unfair” ang nahitabo kang Douthit. Seguro ko nga duna siya kahiubos nga wala siya makaapil sa World Cup kay mas gihatagan og importansya si Blatche. Dili kini lalim ug sayon dawaton. Sa iyang edad karon nga 34, wa na siya’y tsansa pa nga makaduwa sa sunod nga FIBA World Cup kay 39-anyos na siya nianang panahona ug dili ko motuo nga kuhaon siya sa Pilipinas para ana.
Karon lang unta ang kahigayonan apan naupawan siya ni Blatche. Bilib lang ko ni Douthit, wala niya kini gipakita sa publiko ug bisan na sa mga interviews kaniya ang kahiubos. Mature ug professional kaayo niyang gidawat ang kamatuoran nga dili siya makaduwa sa FIBA World Cup. Daku gyud ang iyang garbo nga apil siya sa naka-contribute sa pag-abante sa Pilipinas sa basketbol.
Sa pagka karon, di ko sure kun unsa o kun duna pa bay ‘driving force’ si Douthit aron mas maningkamot pa sa Asian Games nga wala na may World Cup nga iya pang maapilan.
Seguro ko nga duna may motibo pa si Douthit aron makuha sa Pilipinas ang bulawang medalya sa Korea, personal na lang ang rason. Malaumon hinuon ko nga dunay dakung “improvement” nga ipakita karon si Douthit, total mahimo pa man seguro siyang kuhaon og balik sa NBA.
Sa laing bahin, si Blatche maoy nabulahan sa iyang mubo nga pakig-uban sa Gilas Pilipinas. Nakakuha siya og exposure sa international arena ug nakita ang iyang kapabilidad. Gani nindot ang iyang performance sa individual stats, mahimo kaayo niya kining puhonan aron makabalik siya sa National Basketball Association ug mas gamiton na unya siya sa team nga makakuha niya.
Duna nay nanggawas nga reports nga may mga teams nang interesadong mokuha niya. Lahi ra gyud ang exposure sa FIBA World Cup. Kun mahitabo man nga matinuod ang pangandoy ni Blatche nga makabalik sa NBA, maayo lang unta nga di niya kalimtan nga dunay kontribusyon ang Gilas Pilipinas nga nakita ang iyang potensyal sa paint.
* * *
PAGTULON-AN: “Mas maayong naa ka apan wa nimo kinahanglana, nungka, nagkinahanglan apan wala ka”