SWU COBRAS nagpanikad na

CEBU, Philippines - Human mabalda ang ilang kampanya pag-abante sa final tungod sa pagbunok sa uwan nga misangpot sa pagbaha sa tibuok Metro Cebu niadtong Huwebes, ang  Southwestern University (SWU)  Cobras nagpanikad na pag-angkon sa katapusang luna sa finals sa ilang pakigsangka batok sa third seed  University of San Jose-Recoletos (USJ-R) Jaguars sa 14th Cebu Schools Athletic Foundation, Inc. (CESAFI) basketball event karong adlawa diha sa Cebu Coliseum.

Gikan sa orihinal nga duha ka duwa, gihimo na kining tulo ka mga duwa human gisal-ot ang sangka tali sa No. 2 seed University of the Visayas (UV) Baby Lancers batok sa No. 7 ranked USJ-R Baby Jaguars sa quarterfinal round sa juniors division.

Nagpanikad na ang Cobras moabante sa finals sa ikatulong sunod-sunod nga higayon aron makigsangka batok sa University of San Carlos (USC) Warriors, kinsa  nakasud sa championship round human gitagak ang  University of the Visayas (UV) Green Lancers.

Ang Cobras pangulohan gihapon nilang Landry Sanjo ug Bendley Valdor. Abagan sila sa mga lokal nga silang Mark Jayven Tallo, Jasper Parker, Anton Tomas Pardo, Melvin Holper ug mga bigmen nga silang Daryl Goloran ug Bernie Bregondo.

Sa ilang bahin, ang  Jaguars magsalig sa ilang import nga si Quentin Luzoladio uban sa lokal  nga silang  James Regalado, Kevin Villafranca ug Mark Labares. Laing mga sinaligan sa Jaguars naglakip  nilang Renzo Theodore  Sening, Raymond Catipay, Iron Suano, Fletcher Galvez, Kyle Lajato ug Nelvin Navarra.

Sa pikas bahin,  ang  third seed University of San  USC Baby Warriors mosuway sab sa pag-abante ngadto sa semifinals dihang ilang ikasangka ang sixth seed University of Southern Philippines Foundation (USPF) Baby Panthers sa  juniors division.