Floyd daog gihapon, Mayweather bukas sa Pacquiao fight

CEBU, Philippines – Ang kamot gihapon ni world pound-for-pound king Floyd Mayweather Jr. ang giisa atol sa iyang rematch batok ni Marcos Maidana, apan nahimo na usab nga hugaw ang sangka tali niya ug sa Argentinean brawler kagahapon didto sa MGM Arena sa Las Vegas.

Si Mayweather midaog pinaagi  sa unanimous decision aron mapanalipdan ang iyang WBC ug WBA welterweight titles.

Gibarugan hinuon ni Mayweather ang iyang saad nga mas mopakita pa og nindot nga lihok itandi sa una niyang sangka  ni Maidana niadtong Mayo dihang mipasud siya og mga limpyong kombinasyon sa pagsugud sa away.

Apan  nahimong interesante ang away dihang mireklamo si Mayweather nga gipaak ni Maidana ang iyang kamot dihang migakus siya sa Argentinean boxer.

"When the referee was breaking us, he (Maidana) bit my hand," matud pa ni Mayweather sa Associated Press.

Mihimakak hinuon si Maidana kinsa wala gihapon makakita og solusyon sa depensa ug kaidlas sa undefeated American boxer.

Wala hinuon kaikyas si Maidana sa point-deduction dihang  iyang giduso ang nawng ni Mayweather sa 10th round. Si Maidana  mibuhat niini tungod sa pagpunay og pandumog sa American boxing  star.

Ang 37-anyos  nga si Mayweather kinsa gikataho nga mokita  og $32 million mipalambo sa iyang record ngadto sa 47-0, 26KOs, samtang si Maidana nahagsa ngadto sa 35-3, 31KOs.

Sa laing bahin si Mayweather bukas sa Pacquiao fight  human sa iyang unanimous decision nga kadaugan batok ni Marcos Maidana, ang reigning world pound wala kaikyas sa pangutana kun isunod na ba niya ang dugay nang gipaabot sa mga boxing fans nga sangka batok ni Manny Pacquiao.

Wala hinuon direkta nga mitubag niini si Mayweather, apan ang American boxer miingon nga bukas siya sa posibilidad nga ikaharung si Pacquiao.

Si  Mayweather una nang miingon nga moretiro siya sa sunod tuig ug duha nalang ka away ang nahibilin sa di pa siya  moundang sa maong sport.

"If the Manny Pacquiao fight comes around, let's make it happen," matud pa ni Mayweather atol sa post-fight interview diin  nahugyaw ang mga boxing fans didto sa MGM Arena sa iyang tubag.

Si Mayweather nagplano nga moaway pag-usab sa Mayo sunod tuig ug daghan ang naglaum nga si Pacquiao na ang iyang  atubangon. (BANAT NEWS)