USC naglisud sa UC

CEBU, Philippines - Miagi una og  overtime ang University of San Carlos (USC)  Warriors sa wala pa nila mapilde ang University of Cebu (UC) Webmasters, 69-66  sa 14th  Cebu Schools Athletic Foundation, Inc. (CESAFI)  kagabii  didto sa Cebu Coliseum.

Medyo natay-og sa makadiyot ang Warriors sa maong duwa tungod kay wala gyud sila makalubong  sa Webmasters. Sayes puntos ang labing dakung labaw sa Warriors  ug nahitabo kini atol sa overtime.

Sa laing bahin, ang UC kinsa napilde sab sa USC sa first round, 65-74 niadtong Agosto 19, milabaw og sayes puntos  sa third period human sa basket ni Jan Michael Auditor.

Hugot nga depensa sa Webmasters ilabi na ngadto sa mga imports sa Warriors nga silang Shooster Olago ug Espoir Toyambi maoy hinungdan nga nakasustenir sila sa 40 minutos nga kumbati.

Ang duha ka free throws ni Justin Dacalos  maoy nakapatabla sa iskor, 57-all sa regulation hinungdan sa overtime.

Ang Warriors (9-1)  gipangulohan nilang Olago ug Toyambi sa ilang 20 puntos matag usa. Samtang ang Webmasters (1-8) gipangulohan sab ni Dacalos sa iyang 17 puntos. Si  Clint Suleto miamot og 13 puntos, samtang sila si Carlos Tabaquero ug Auditor mihakot og 11 puntos matag usa. (BANAT PALARO)