CEBU, Philippines - Milampos si John Mier pagdepensa sa iyang titulo sa 4th TORCC Luray II Mountainbike Cross-Country Challenge didto sa dakbayan sa Toledo.
Si Mier, ang kanhi national track cycling team member ug karon nahimong mountainbike rider bag-o lang misalmot sa ASEAN Mountainbike Cup didto sa Malaysia.
Human sa iyang kampanya didto sa Malaysia, si Mier mipakita na sab sa iyang katakus aron mapanalipdan niya ang iyang men’s open title batok nilang Roy Carbonera ug Kit Cabonita nga mipahiluna sa ikaduha ug ikatulo nga dapit.
Yano kaayong gisubay ni Mier ang rota didto sa Luray sud sa walo ka laps nga adunay 1.8 kilometros matag lap.
Sa iyang bahin, si Mitchel Pilapil, maoy nidaog sa veteran’s class batok nilang Nilo Barbalose ug Edwin Borinaga nga miangkon sa mosunod nga duha ka luna.
Naghari sab si Ryhke Armas sa combined junior-senior class batok ni May-may Hernando, samtang si Melvin Codoy napunta sa ikatulo.
Giangkon sab ni Jun Duron ang master’s class title batok nilang Dadong Carcueva ug Wenny Montoya.
Si Ike Cabarles mikawat sab og salida pinaagi sa pagdaog sa executive class title. Sila si Junar Pamplona ug Gian Batac miokupar sa ikaduha ug ikatulo nga dapit.
Sa beginners class, si Rio Hernando maoy misakmit sa kampiyonato batok nilang Jonathan Bacus ug Aldwin Pilapil.
Sa all-Toledo open, si Nikko Otadoy maoy milangkat sa korona batok ni Gregorio Gadiano, samtang si Limbert Tirol nalagpot sa ikatulo. (BANAT PALARO)