‘Ala boys’ moaway na sa Dubai
CEBU, Philippines - Moaway na ang tulo ka ALA Boxing Gym fighters alang sa dungog sa nasud batok sa tagsa-tagsa nila ka mga langyaw’ng kaatbang sa makasaysayanon ug labing unang “Pinoy Pride” fight card didto sa Dubai nga uloha’g “Duel in Dubai” karong gabii didto sa Dubai World Trade Center.
Sa ika-27 nga edisyon sa malampusong boxing series sa nasud, ang undefeated boxers nga sila si Genesis ‘Azukal’ Servania ug ‘King’ Arthur Villanueva uban ang kanhi world title challenger nga si Rey ‘Boom Boom’ Bautista mosuway paghatag og dungog sa nasud pinaagi sa pagpukan sa ilang mga kaatbang.
Si Servania nga walay pilde sud sa 24 ka away, 20 gikan sa knockout moaway sa main event batok ni Mexican Jose ‘Matador’ Cabrera (22-4, 10KOs) alang sa WBO Intercontinental super bantamweight title.
Ang taga-Bacolod City mitimbang og 121.4 pounds, samtang si Cabrera adunay gibug-aton nga 122 lbs atol sa weigh-in kagahapon.
Sa iyang bahin, si Villanueva (25-0, 14KOs) mosugal sa iyang IBF International super flyweight title batok sa Nicaraguan nga si Henry ‘El Crespo’ Maldonado (19-3, 14KOs) sa Nicaragua.
Dili kakompiyansaan si Maldonado kay giila kini nga usa ka knockout artist. Hinuon, dili na mahimong makuha pa ni Maldonado ang bakus bisan pa’g modaog siya batok ni Villanueva tungod kay pakyas siya pagkuha sa 115 lbs. weight limit atol sa official weigh-in.
Sa iyang bahin, ang taga-Bohol nga si Bautista (35-3, 25KO) mag-atubang og lisud nga sangka batok ni WBC Mundio Hispo junior lightweight champion nga si Jose ‘Piquet’ Martinez (19-1, 16KOs). (BANAT PALARO)
- Latest
