Naghinam-hinam na ang tibuok nasud kung unsa gyu'y resulta sa atong kampanya sa FIBA World Cup of basketball didto sa Spain karong Sabado, Agosto 30. Matapos ang maong torneyo sa Septiyembre 11.
Unom na lang ka adlaw gikan karon ug matag adlaw musamot sab ang atong kahinam. Kahinam kung pila ka teams ang atong pildehon ug kahinam kung pila ka puntos ang atong pilde gikan sa mga lig-on nga teams.
Kanunay na sab nato madungog sa "coaching huddle" ang abiba nga "Laban Pilipinas, puso!"
Ang atong kapildehan gikan sa kamot sa Angola, ang FIBA Africa champion naghatag og daotang senyales nga delikado gyud nga dili kita makatilaw bisan usa ka daog didto sa Spain. Ang dungog ra gyud nga atong na-angkon sa kasamtangan nga nakabalik kita sa kalibotan sa international basketball.
Kung sa tune-up mas daghan kita'g pilde nga posible wala kita tinuora sa atong mga kontra, unsa na kahay atong dangatan kung opisyal na gyud nga duwa. Sa mga resulta sa tune-up, kung modaug ang Gilas gamay ray ligas apan kung mapilde ang Gilas, kanunay kitang ilampurnas. Sa ratio and proportions, ratio ra kita kutob dili proportion.
Ang mosunod mao ang opisyal nga schedule sa duwa sa Group B diin nahisakop ang Pilipinas uban sa laing lima ka teams.
Aug. 30--- Philippines vs. Croatia
Aug. 31--- Philippines vs. Greece
Sept. 1--- Philippines vs. Argentina
Sept. 3--- Philippines vs. Puerto Rico
Sept. 4--- Philippines vs. Senegal
Atong tagsa-tagsaon og himbis kining atong kontra aron duna kitay ideya kung kinsa gyu'y posible natong mabihag.
Pilipinas batok Croatia--- Kining Croatia maoy usa sa labing maayong team sa Europe. Usa sa labing inila nga player mao si Toni Kukoc, teammate ni Michael Jordan sa Chicago Bulls nga midaog og unom ka NBA titles.
Pilipinas batok Greece--- Nailhan kining Greece sa mga physical players. Dihay rambol kaniadto sa World Cup nga naglambigit og Greek players. Mga tag-as ug mga hingigo sa gawas. Daghan sab kini'g produkto sa NBA sama kanilang Kosta Koufos sa Utah Jazz, Giannis Antetokuonmpo sa Milwaukee Bucks, Nick Calathes sa Memphis Grizzlies ug Kostas Papanikolauo sa Houston Rockets.
Pilipinas batok Argentina--- Swerte ang Pilipinas dili moduwa si Manu Ginobili ang shooter sa San Antonio Spurs apan dili kita malipay kay duna pay duha ka NBA players nga moduwa nga silang Luis Scola sa Indiana Pacers ug si Pablo Prigioni sa New York Knicks.Gani nagkanyon kini si Prigioni nga huyang karon ang Team USA tungod kay wala ang mga inilang superstars. Tataw nga wala sila makurat sa Pilipinas.
Pilipinas batok Puerto Rico--- Duna say duha ka abtik nga NBA players ang Puerto Rico nga parehong point guards nga silang JJ Barea ang kanhi sakop sa champion team Dallas Mavericks ug si Carlos Arroyo.
Pilipinas batok Senegal--- Dinhi maoy bugtong natong paglaum nga dili kita mabokya didto sa Spain. Apan duna sab diay kini sila'y tinagoan nga usa ka NBA player nga si Hamady N'Dranye ug duha ka players nga NCAA stars nga silang Louis Adams sa South Carolina State University ug Paco Diaw sa Lee University.
Good luck Gilas Pilipinas!