CEBU, Philippines - Ang masaarong Cebuano rider nga si John Flores maoy mokawat sa atraksyon sa ikaupat nga episode sa MX-R LS (Motocross Rider Life Story), ang bag-ong segment sa MS Motosuit Motocross TV series nga makita sa CCTN 47 matag Sabado gikan sa alas-10 hangtod sa alas-10:30 sa buntag.
Ang replays sa senemanang pasundayag gitakda matag Domingo sa alas-10:30 hangtod sa alas-11 sa gabii.
Gawas nga nakabaton og talagsaong abilidad, si Flores hitsuraan sab nga naghimo kaniya nga “darling of the crowd” matag lumba nga iyang apilan.
Sa iyang batan-ong karera, si Flores mikolekta na og daghang mga dungog uban ang “back-to-back” championships niadtong 2010 ug 2011 season sa tinuig nga MS Motosuit Motocross Series.
“John Flores is one of the best riders we ever had. A well-rounded athlete, he’s a fierce competitor in the racing circuit. It’s a good thing for the young aspiring racers to take a look of his inspiring story of success,” matud pa ni MS Motosuit big boss Lou Ornopia.
Ning tuiga, si Ornopia mopasiugda og unom ka legs nga pagahimuon sa nagkalain-laing dapit sa probinsiya. Tanang lumba ubos sa MS Motosuit Series isalida sa CCTN 47. (BANAT PALARO)