CEBU, Philippines- Daog maoy misugat sa University of Cebu (UC) jins sa una nilang misyon sa ikatulong edisyon sa Philippine Taekwondo League (PTL)-Cebu niadtong miaging weekend didto sa SM-Consolacion.
Ang UC miiskor og makabungog nga kadaugan batok sa San Roque Development School sa Liloan, 96-34 sa cadet boys category, samtang ang UC Team B milatos sa ilang igsuong Team A, 44-39 sa junior girls class.
Sa seniors division, ang UC-A midemolis sa Indiana Aerospace University, 63-38.
Ang kalihukan nga gidumala ni coach Avenger B. Alob Jr. isip tournament manager ug Kenneth Toledo isip chief of referee mogamit og talagsaong “Tag Team” format. Matag team langkuban og lima ngadto sa 10 ka mga miyembro diin ang unang lima ka players magsangka sud sa usa ka minuto matag usa.
Sa ikaduhang round, bisan kinsa na nga miyembro ang moaway sud sa lima ka minutos nga walay pagpili sa timbang ug gitas-on. Gani ang usa ka finweight mahimong moaway sa mas bug-at nga kaatbang.
Ang coach mahimo nga mag-ilis og magduduwa bisan unsang orasa sud sa gitaganang singko minutos.
Ang tanang iskor nga nakuha sa matag miyembro ipunon, diin ang topscorer modaog sa sangka.
Ang aksiyon nga gimugna o huna-huna ni Grandmaster Hong Chun Sung, ang chief instructor sa Philippine Taekwondo Association uban ni commissioner Monsour del Rosario, himuon matag adlaw’ng Domingo diha sa SM-Consolacion. Matapos kini sa bulan sa Nobiyembre ning tuiga. (BANAT NEWS)