CEBU, Philippines - Suwayan sa University of San Carlos (USC) Warriors nga magsolo sa ikaduhang dapit sa dihang ilang sangkaon ang Cebu Institute of Technology-University (CIT-U) Wildcats karong adlawa sa 14th Cebu Schools Athletic Foundation, Inc. (CESAFI) diha sa Cebu Coliseum.
Sa main game, ang naglisud nga defending champion University of the Visayas (UV) Green Lancers mosuway og bangon gikan sa labing ngil-ad nilang sinugdanan, 1-3 win-loss record sa ilang sangka batok sa University of San Jose- Recoletos (USJ-R) Jaguars.
Ang Warriors bag-o lang midaog pinaagi sa overtime batok sa Lancers, 83-74 niadtong Agosto 9 ug sila maoy mas paborito batok sa Wildcats aduna sila’y duha ka reinforcements nga silang Espoir Toyambi ug Shooster Olago.
Ang Warriors ug Wildcats parehong midaog sa Lancers, apan usa lang kanila ang modagit og laing daog karong gabii.
Ang labing lig-on nga unit sa Wildcats nga ilang iparang batok sa Warriors mao ang ilang starting five nga gilangkuban sa ilang leading scorer nga si Joshua dela Cerna, uban nilang Allan Dimco, Jose Marlo Pono, Franklyn Batiquin ug Jeffrey Taghoy.
Apan tungod kay ang Wildcats walay import, walay nasayod kun unsaon nila pagpugong ang puwersa nilang Toyambi ug Olago.
Sa ilang bahin, ang Warriors nga giilang usa ka top contender karon nga season magsalig nilang Nico Magat, Christian Laude, Victor Rabat ug Ian Ortega nga pulos delikado kun mabakante sa gawas, makatabang sab si Charles Pepito sa depensa ug sa rebounding samtang ang batan-ong pointguard nga si Kiefer Lim nagpakita og dakung umento sa iyang duwa sa quarterbacking.
Sa secondary matches, maglayog ang University of Southern Philippines Foundation (USPF) Baby Panthers ug ang Don Bosco Technology Center (DBTC) Junior Greywolves nga gikatakda sa ala-1 sa hapon. Sundan kini sa duwa tali sa University of Cebu (UC) Junior Webmasters ug sa CIT-U Wildkittens sa alas-2:30 sa hapon. (BANAT NEWS)