CEBU, Philippines - Walay hunong ang pagmangtas sa Convergys 2 Blue Devils dihang ila na sab nga gibiktima ang Teletech Titans, 71-53 sa 10th CSCC E-League basketball tournament diha sa City Sports Club-Cebu gym sa Cebu Business Park.
Si Clifford Amarado mipauwan og 21 puntos alang sa Convergys 2 nga mao na lang ang bugtong team nga wala pay pilde niini nga season sa ilang 7-0 nga baraha.
Ang Teletech gipangulohan sab ni Jaygard Vios, kinsa mikutlo og 13 puntos, gisundan ni John Felix Cabahug nga adunay 11 puntos. Apan wala kini makatabang sa pagpadaog sa Teletech nga nakatilaw sa ilang ikalimang pilde batok sa duha ka daog.
Sa laing duwa, si Archie Brian Vincent Batua mipabuto’g 28 puntos uban ang unom ka rebounds alang sa Accenture Sharks nga milubong sab sa Job Target Bandits, 91-54 aron magsolo sa liderato sa Division 1 bitbit ang 7-1 nga baraha.
Si Ryan Edward Llanos mibahog og 24 puntos alang sa Accenture nga miposte’g 26-11 nga bentaha human sa first quarter.
Gilubong sab sa Telstra Boomerang ang 24/7 Cagers sa iskor 91-24 alang sa ilang ikaduhang daog sud sa pito ka duwa, samtang ang ePerformax Reds walay kukaluoy nga nimasaker sa GGS Griffins, 83-30.
Si Sam Jordan Hermoso maoy topscorer sa Telstra nga mipupo’g 20 puntos, gisundan ni Jonathan Delima sa iyang 18 puntos.
Sa laing bahin, sila si Rafael Jose Cuico ug Brian Canares Abella milansang og 14 puntos matag usa alang sa ePerformax Reds nga nagsolo sa ikaduhang dapit sa Division 2 sa ilang 6-1 nga baraha. (BANAT PALARO)