Cobras mitukob sa Wildcats sa 14th CESAFI

CEBU, Philippines -  Daw adunay bug-at nga katarungan ang ubang team sa pagpasaka’g protesta aron dili makaduwa ang Cameroonian import  nga si Bendley Valdor tungod kay siya maoy nagtuboy sa Southwestern University (SWU) Cobras ngadto sa 82-68 nga kadaugan batok sa Cebu Institute of Technology-University (CIT-U)  Wildcats sa 14th  Cebu Schools Athletic Foundation Inc. (CESAFI)  niadtong Martes sa gabii diha sa Cebu Coliseum.

Si Valdor mihipos og 15 puntos alang sa Cobras nga temporaryong nagsolo sa liderato sa ilang 2-0 nga baraha.    Si Landy Sanjo miamot og 13 puntos, samtang ang star playmaker nga si Mark Jayven Tallo mitampo’g 12 puntos. Nakapanimaho og sayong kadaugan ang Cobras human molabaw og 12 puntos, 78-66 sa nahabiling uno minuto sa duwa.

Silang Joshua dela Cerna ug Allan Dimco miiskor og 16 puntos matag usa aron pangulohan ang Wildcats nga nagtangag og 1-1 nga baraha. Si Franklyn Batiquin mikulit og 15 puntos, samtang si Steven Bucao mikadlit og 11 puntos.

PUNTOS MATAG USA

SWU (82) –  Valdor 15, Sanjo 13, Tallo 12, Pardo 10, Goloran 9, Parker 5, Labitad 5, Bregondo 5, Luz 4, Holper 3, Lagbas 1.

CIT-U (68) – De la Cerna 16, Dimco 16, Batiquin 15, Bucao 11, Taghoy 4, Lucena 4, Kong 2.