UV mobangon

CEBU, Philippines- Paninguhaon sa defending champion University of the Visayas (UV) Green Lancers nga mobangon gikan sa ilang kapildihan sa dihang  harungon nila ang University of Cebu (UC)  Webmasters, kinsa naglaraw sa ilang ikaduhang daog sa 14th Cebu Schools Athletic Foundation Inc. (CESAFI) basketball event karong gabii diha sa Cebu  Coliseum.

Ang     UV-UC showdown gikatakdang sugdan sa alas-6:45 sa gabii human sa engkuwentro sa Sacred Heart School-Ateneo de Cebu (SHS-AdC) Magis Eagles ug University of Southern Philippines (USPF) Baby Panthers sa juniors division sa alas-5:15 sa hapon.

Mga duwa karon (Cebu Coliseum)

5:15 pm – SHS-AdC vs. USP-F     (Jrs.)

6:45 pm – UC vs. UV         (Srs.)

Nagtabla karon ang Webmasters ug ang Southwestern University (SWU) Cobras sa 1-0, apan ilang tumong karon nga magsolo sa liderato.

Nakaeskapo ang Cobras kaniadtong Domingo batok sa University of San Carlos (USC) Warriors, 69-67.

Ang UC midaog batok  sa University of San Jose- Recoletos (USJ-R) Jaguars sa overtime, 100-96 niadtong Domingo, samtang ang UV napilde ngadto sa Cebu Institute of Technology-University (CIT-U) Wildcats , 60-67.

Ang Webmasters, usa sa duha ka collegiate teams nga wala mokuha’g import maoy mohupot sa solong liderato sa higayon nga modaog sila sa Lancers. Apan dili kini sayon buhaton ilabi na kay buot sab sa Lancers nga maglikay nga magsugod og 0-2 nga wala pa mahitabo sukad sa milabay nga 13 ka seasons.

Seguradong andam na ang Lancers ug Webmasters  nga mopakita sa ilang katakus aron makab-ot ang ilang gipangandoy.

Sa laing bahin,  sila si  Landry Sanjo ug si Mark Jayven Tallo nagkumboya’g 45 puntos aron pangulohan ang Cobras pagpukan sa Warriors. Si Sanjo miposte’g 25 puntos, apan si Tallo maoy napiling best player of the game nga adunay 20 puntos uban ang unom ka rebounds, lima ka assists ug duha ka steals.

Silang Shooster Olago ug Espoir Toyombi mao sab ang nangu sa Warriors sa ilang 17 ug 14 puntos matag usa.

PUNTOS MATAG USA

SWU (69) – Sanjo 25, Tallo 20, Parker 6, Pardo 6, Goloran 6, Lagbas 5, Bregondo 1.

USC (67) – Olago 17, Toyambi 14, Rabat 12, Laude 9, Tagapan 5, Bensig 2, Lim 2, Ortega 2, Magat 2.