CEBU, Philippines- Gipanitan sa Convergys 2 Blue Devils ang SSI Warriors, 73-55 alang sa ilang season-best 6-0 record sa 10th CSCC E-League basketball tournament niadtong Domingo diha sa City Sports Club-Cebu gym sa Cebu Business Park.
Si Clifford Amarado mipabuto’g 22 puntos ug si Joselito Aranda mikadlit og 12 puntos alang sa Convergys 2 nga midiktar sa duwa gikan sa pagsugod hangtod nahuman.
Ang Convergys 2 miaksiyon og takilid human moposte’g 21-12 sa first period, apan nakabawi kini aron moiskor og 18 puntos nga kadaugan, ingon man mao ang bugtong team nga pabiling walay pilde sa liga.
Si Lawrence Daven Agas mihipos og 18 puntos, samtang si Robert Espinoza mitampo’g 16 puntos alang sa SSI, kinsa nakatilaw sa ilang ikatulong pilde sa walo ka duwa. (BANAT NEWS)