CEBU, Philippines- Midaug ang National University Bulldogs batok sa University of the East Red Warriors, 57-55 kagabii aron pabiling maghupot sa solo'g liderato sa UAAP Season 77 didto sa Smart Araneta Coliseum.
Ang Bulldogs kinsa gipangulohan sa ilang import nga si Alfred Aroga, aduna na karo'y 5-1 nga baraha samtang ang Red Warriors mitidlum ngadto sa 2-3 nga baraha.
Si Aroga miposa og 18 puntos alang sa Bulldogs. samtang silang forwards Glenn Khobuntin ug Troy Rosario miamot og 11 puntos matag usa.
Ang Red Warriors gipangulohan ni Roi Sumang sa iyang 16 puntos.
Sa laing bahin, midaug ang Ateneo Blue Eagles batok sa Far Eastern University Tamaraws, 81-78 ug si Kiefer Ravena nahibawo kanus-a siya magduwa nga adunay “Beast Mode”.
Si Ravena miburak og 23 putnos alang sa 4-1 nga Ateneo samtang ang 3-2 nga Tamaraws gipangulohan ni Mac Belo sa iyang 22 puntos. (GGM) (BANAT NEWS)