Cebuana Jin naka-bronze sa World Championships

CEBU, Philippines - Mihimo og kasaysayan ang  Sugbuanang si Mayn Coran dihang nahimo siya isip labing bata nga local taekwondo jin nga midaog og medalya sa 2014 World Cadet Championships didto sa Azerbaijan.

Ang 14-anyos nga si Coran midaog og bronze medal alang sa Team Cebu ug sa tibuok nasudnong koponan human siya mipakita sa iyang abilidad sa kyorugi (sparring event) batok sa uban pang  jins gikan sa nagkalain-laing dapit sa kalibotan.

Mahinungdanon ang maong kadaugan ni Coran ilabi na nga natangtang siya sa national team human siya mapilde sa Carlos Palanca Jr. National Taekwondo Championships didto sa Manila.

Apan sa iyang paningkamot  uban  usab sa suporta ni Philippine Taekwondo Association regional chairman Tony del Prado, si Coran mibangon paingon sa iyang kadaugan didto sa Azerbaijan.

Sa wala pa ang iyang kampanya sa gawas sa nasud, si Coran unang mipakita sa iyang kabangis sa Palarong Pambansa didto sa Laguna. (BANAT NEWS)