Green tagak na, Violet may purohan pa sa Quarterfinal

CEBU, Philippines- Sirado na ang pultahan sa Green team alang sa sunod nga hugna dihang gipahamtangan na sab sila og laing kapildihan batok sa Violet, 78-67 sa nagkainit nga aksiyon sa SRP Sunday Club 6th  Founding Anniversary League  basketball tournament diha sa San  Roque Sports gym sa barangay Subangdaku, dakbayan sa Mandaue.

Ang Violet nga nagbitbit og 3-2 nga baraha gipangulohan ni Jay Pacencia, kinsa mikuykoy og 13 puntos. Si Rommel Camargo mikabkab og 11 puntos, samtang si Romy Rosaroso mikubkob og 10 puntos alang sa Violet nga aduna pay purohan nga moabante sa quarterfinal round.

Kontrolado sa Violet ang kinatibuk-ang duwa diin miabante sila og 15 puntos sa halftime, 40-25.

Ang Violet padayong nanglimbasog  sa second half aron bingaton pa ang ilang labaw ngadto sa 20 puntos sa nahabiling kuwatro  minutos sa third period.

Bisan pa niini, wala gihapon makabsi sa paglaum ang Green ug sa paningkamot ni Jojo Menaling nakan-an ang labaw sa  Violet ngadto na lang sa 10 puntos, 65-75, apan nakawang lang kay wala na sila’y igong oras aron makawat ang kadaugan.

Ang Green nga hingpit nang natagak tungod sa ilang 0-5 nga baraha, gipangulohan ni Menaling, kinsa mitusak og 16 puntos, gisundan ni Mariano Dialogo sa iyang 12 puntos ug Jesus ‘B-Jess’ Bacunawa nga adunay 10 puntos.

Puntos Matag Usa

VIOLET (78) – Pacencia 13, Camargo 11, Rosaroso 10, Andrew 8, Gonzaga 6, Andrian 6, Ontong 5, Colina 4, Sagayno 4, Gabison 3, Nelson 2.

GREEN (67) – Menaling 16, Dialogo 12, Bacunawa 10, Pescante 8, Gingco 6, Simbajon 4, Miñoza 4. (BANAT NEWS)