CEBU, Philippines - Sento porsiyento nga nanganti ang undefeated American champion nga si Chris Algieri nga makahimo siya og usa ka dakung ‘upset’ nga kadaugan batok ni Manny Pacquiao sa Nobiyembre 23 didto sa Macau.
Si Algieri mibasura sa pangagpas sa mga boxing analysts nga mipagamay sa iyang tsansa nga mudaog batok sa eight-division world champion alang sa WBO welterweight title. “One hundred percent I believe I will win,” matud pa ni Algieri sa sweetscience.com.
Ang 30-anyos nga si Algieri nagkanayon nga sama sa iyang kadaugan batok sa gikahadlokang Russian nga si Ruslan Provodnikov, salig siya sa iyang kahigayunan batok ni Pacquiao kinsa seguradong paboran sa kadaghanan nga mudaog.
Si Algieri mipakurat sa kalibutan sa boxing human niya gipilde pinaagi sa split decision ang kanhi sparmate ug higala ni Pacquiao nga si Ruslan Provodnikov aron mailog ang WBO super lightweight title.
“Many people thought that I’d get killed by Ruslan,” matud pa niya. “I think I have a real chance against Pacquiao.”
Ang pagtuo ni Algieri daw gidasunan hinuon sa veteran boxing analyst nga si Al Bernstein kinsa mihatag og kahigayunan sa underdog nga si Algieri nga mudaog.
Si Bernstein miingon nga mas batan-on ug mas gutom sa daog si Algieri rasun nga posibleng masugamak si Pacquiao sa maong away. (BANAT PALARO)